తెలంగాణలో కరువుపై సర్కార్‌ అలర్ట్‌.. జిల్లాలవారీగా కార్యాచరణ!

తెలంగాణలో కరువు, ఎల్‌నినో ప్రభావంతో తలెత్తే పరిస్థితులను ఎదుర్కొనేందుకు రాష్ట్ర, జిల్లా స్థాయుల్లో సమగ్ర కార్యాచరణ ప్రణాళికలు రూపొందించాలని నీటిపారుదల, పౌరసరఫరాల శాఖ మంత్రి కెప్టెన్‌ ఎన్‌. ఉత్తమ్‌కుమార్‌రెడ్డి అధికారులను ఆదేశించారు. జిల్లా కలెక్టర్లకు అవసరమైన నిధులను అందుబాటులో ఉంచాలని, సంబంధిత శాఖలన్నీ సమన్వయంతో పనిచేయాలని సూచించారు. శుక్రవారం హైదరాబాద్‌లోని డాక్టర్‌ బీఆర్‌ అంబేద్కర్‌ రాష్ట్ర సచివాలయంలో ఉప ముఖ్యమంత్రి మల్లు భట్టి విక్రమార్క అధ్యక్షతన జరిగిన కరువు, ఎల్‌నినోపై క్యాబినెట్‌ సబ్‌కమిటీ తొలి సమావేశంలో ఆయన మాట్లాడారు. తాగునీటి సరఫరా, సాగునీటి అవసరాలు, పంటల రక్షణ, సమస్యాత్మక ప్రాంతాల్లో ప్రజలకు సకాలంలో ఉపశమనం అందించడంపై ప్రత్యేక దృష్టి సారించాలని తెలిపారు. క్షేత్రస్థాయిలో సమస్యలను ముందుగానే గుర్తించి, అత్యవసర పరిస్థితుల్లో కలెక్టర్లు వెంటనే స్పందించేలా నిధులు, వనరులు అందుబాటులో ఉండాలని స్పష్టం చేశారు. పరిపాలనా ప్రక్రియల కారణంగా సహాయక చర్యల్లో జాప్యం జరగకుండా చూడాలని సూచించారు.

సమావేశంలో రాష్ట్రంలో వర్షపాతం లోటు, జలాశయాల్లో నీటి నిల్వలు, భూగర్భ జలమట్టాలు, సాగునీటి లభ్యత, వ్యవసాయ పరిస్థితులు, శాఖల సన్నద్ధతను సమీక్షించారు. రాష్ట్రంలోని 358 మండలాల్లో కరువు సంబంధిత సమస్యలు ఉన్నట్లు అధికారులు వివరించారు. వీటిలో 315 మండలాలు నిర్దేశిత కరువు అంచనా ప్రమాణాలకు సరిపోగా, మరో 43 మండలాల్లో పంటనష్టం ముప్పు ఉన్నట్లు తెలిపారు. ఈ మండలాలకు సంబంధించిన ఆధారాలతో కూడిన వివరాలను కేంద్రానికి సమర్పించే నివేదికలో చేర్చి, వర్తించే పథకాల కింద సహాయం కోరే అంశంపై చర్చించారు. రాష్ట్రంలో సుమారు 24 శాతం వర్షపాతం లోటు నమోదైందని, జలాశయాల్లో నీటి నిల్వలు సాధారణ స్థాయి కంటే తక్కువగా ఉన్నాయని సమావేశంలో వెల్లడైంది. పలు ప్రాంతాల్లో భూగర్భ జలాలపైనా ఒత్తిడి నెలకొన్నట్లు అధికారులు వివరించారు. వ్యవసాయం, తాగునీటి సరఫరా, గ్రామీణ జీవనోపాధులపై కరువు ప్రభావాన్ని తగ్గించేందుకు నిరంతర పర్యవేక్షణ, సకాలంలో నిధుల కేటాయింపు, శాఖల సమన్వయంతో చర్యలు చేపట్టాలని సమావేశం నిర్ణయించింది. మంత్రులు తుమ్మల నాగేశ్వరరావు, పొంగులేటి శ్రీనివాస్‌రెడ్డి, సీతక్క, వాకిటి శ్రీహరి, ప్రభుత్వ ప్రధాన కార్యదర్శి సంజయ్‌ జాజుతోపాటు పలువురు ఉన్నతాధికారులు పాల్గొన్నారు.