స్విట్జర్లాండ్‌లో వేగంగా కరుగుతున్న మంచు..

తెల్లని మంచు శిఖరాలు, పచ్చని లోయలకు ప్రసిద్ధి చెందిన స్విట్జర్లాండ్‌లో హిమానీనదాలు వేగంగా కరుగుతుండటం ఆందోళన కలిగిస్తోంది. ఈ ఏడాది దేశంలోని మొత్తం మంచు పరిమాణం 5.5 శాతం తగ్గినట్లు శాస్త్రవేత్తలు వెల్లడించారు. ప్రపంచవ్యాప్తంగా నమోదైన మంచు నష్టాల్లో ఇది రెండో అతిపెద్ద క్షీణతగా పేర్కొంటున్నారు. మంచు వేగంగా కరగడంతో పర్వత ప్రాంతాల దిగువన ఉన్న గ్రామాల భవిష్యత్తుపై ఆందోళనలు పెరుగుతున్నాయి. మరోవైపు, హిమానీనదాలు వెనక్కి వెళ్లడంతో దశాబ్దాల క్రితం గల్లంతైన పర్వతారోహకుల మృతదేహాలతో పాటు, శతాబ్దాల నాటి చారిత్రక వస్తువులు కూడా బయటపడుతున్నాయి.

మంచు కింద దాగి ఉన్న ఈ చారిత్రక ఆనవాళ్లను ప్రజలకు పరిచయం చేసేందుకు స్విట్జర్లాండ్‌లోని లూసర్న్ నగరంలో ‘ట్రెజరీ ఆఫ్ ఐస్’ పేరుతో ప్రత్యేక ప్రదర్శన ఏర్పాటు చేశారు. ఇందులో సుమారు 2,000 ఏళ్ల నాటి రోమన్ విగ్రహం ప్రత్యేక ఆకర్షణగా నిలుస్తోంది. హిమానీనదాలు కరగడం వల్ల వెలుగులోకి వస్తున్న ఈ వస్తువులు గతకాలపు జీవనశైలి, చరిత్రకు సంబంధించిన ఆసక్తికర విషయాలను తెలియజేస్తున్నాయి. అయితే, ఈ పరిణామం ఒకవైపు చారిత్రక సంపదను వెలుగులోకి తెస్తున్నప్పటికీ, మరోవైపు వాతావరణ మార్పుల ప్రభావం, మంచు క్షీణత వల్ల ఏర్పడే పర్యావరణ ప్రమాదాలపై ఆందోళనలను పెంచుతోంది.