ఢిల్లీ హైకోర్టు సమీపంలో రహదారి భద్రతపై సుప్రీంకోర్టు సీరియస్

దేశ రాజధాని ఢిల్లీలోని హైకోర్టు సమీపంలో రహదారి భద్రత సమస్యల పరిష్కారంలో జాప్యంపై సుప్రీంకోర్టు తీవ్ర అసంతృప్తి వ్యక్తం చేసింది. శుక్రవారం ఈ అంశంపై విచారణ జరిపిన జస్టిస్ జేబీ పార్దీవాలా, జస్టిస్ కేవీ విశ్వనాథన్‌లతో కూడిన ధర్మాసనం.. మధుర రోడ్డులోని ఢిల్లీ హైకోర్టు సమీప కూడలి వద్ద పాదచారులు ఎదుర్కొంటున్న ఇబ్బందులపై ఆందోళన వ్యక్తం చేసింది. సరైన పాదచారుల క్రాసింగ్ సదుపాయాలు లేకపోవడం, ట్రాఫిక్ నిర్వహణలో లోపాలు ఉండటంతో ప్రజల భద్రతకు ముప్పు ఏర్పడుతోందని పేర్కొంది. సమస్యలను గుర్తించి, క్షేత్రస్థాయిలో ఆచరణాత్మక పరిష్కారాలను అమలు చేయాలని అధికారులకు స్పష్టం చేసింది. కేవలం కమిటీల సమావేశాలకే పరిమితం కాకుండా పనులను వేగవంతం చేయాలని ఆదేశించింది.

కేంద్ర ప్రభుత్వం తరఫున అదనపు సొలిసిటర్ జనరల్ కమిటీ ఈ సమస్యను పరిశీలిస్తోందని, ఉన్నతాధికారులతో చర్చలు జరిపామని కోర్టుకు తెలిపారు. అయితే మరో ఉన్నతస్థాయి కమిటీ అవసరమేమిటని ప్రశ్నించిన ధర్మాసనం, సమస్యను గుర్తించి పరిష్కార మార్గాలను సూచించేందుకు అమికస్ క్యూరీ సహాయం తీసుకోవాలని సూచించింది. నవంబర్ 25లోపు అవసరమైన పనులను పూర్తి చేయాలని గడువు విధించింది. అధికారులు నిర్లక్ష్యం వహిస్తే అదనపు సొలిసిటర్ జనరల్‌తో పాటు ప్రధాన కార్యదర్శిని కూడా కోర్టుకు పిలిపించాల్సి వస్తుందని హెచ్చరించింది. ఈ సందర్భంగా న్యాయమూర్తులు సరదాగా స్పందిస్తూ, నిర్దేశిత గడువులోగా సమస్య పరిష్కారం కాకపోతే ఢిల్లీ హైకోర్టు ప్రధాన ద్వారం వద్ద తామే ధర్నాకు కూర్చుంటామని, పని పూర్తయ్యే వరకు అక్కడి నుంచి కదలబోమని వ్యాఖ్యానించారు. దేశ రాజధానిలో పలు నిరసనలు కొనసాగుతున్న నేపథ్యంలో సుప్రీంకోర్టు వ్యాఖ్యలు ప్రాధాన్యం సంతరించుకున్నాయి.