పెళ్లిపై సమాజం ఆలోచనా ధోరణి మారాలి.. సబీర్ భాటియా కీలక వ్యాఖ్యలు

హాట్‌మెయిల్‌ సహ వ్యవస్థాపకుడు సబీర్‌ భాటియా.. వ్యక్తిగత, వృత్తిపరమైన సమస్యలకు వివాహమే పరిష్కారమనే ధోరణిపై విమర్శలు చేశారు. డిప్రెషన్‌తో బాధపడుతున్నా, ఉద్యోగం లేక ఇబ్బందులు ఎదుర్కొంటున్నా, కెరీర్‌లో సవాళ్లు ఎదురైనా, జీవితంపై అసంతృప్తితో ఉన్నా పెళ్లి చేసుకోవాలని చాలామంది సలహా ఇస్తుంటారని ఆయన పేర్కొన్నారు. వివాహాన్ని ప్రతి సమస్యనూ పరిష్కరించే ‘మాయా లడ్డూ’గా భావించడం సరైనది కాదని తన అభిప్రాయాన్ని వ్యక్తం చేశారు.

వివాహం అనేది ఒక బంధం మాత్రమేనని, జీవితంలోని అన్ని సమస్యలకు అది పరిష్కారం కాదని సబీర్‌ భాటియా స్పష్టం చేశారు. వ్యక్తుల మానసిక స్థితి, ఆర్థిక పరిస్థితులు, కెరీర్‌ లక్ష్యాలతో సంబంధం లేకుండా పెళ్లిని జీవితంలో తదుపరి అడుగుగా చూడటం భారతీయ సమాజంలో చాలాకాలంగా కొనసాగుతున్న ధోరణి. ఈ నేపథ్యంలో ఆయన వ్యాఖ్యలు సామాజిక ఒత్తిళ్లు, వ్యక్తిగత నిర్ణయాలు, జీవిత సమస్యలను ఎదుర్కొనే విధానంపై చర్చకు దారితీస్తున్నాయి.