ఒకే ఏడాదిలో రెండోసారి.. కుర్సియాంగ్ అడవుల్లో నల్ల జింక కలకలం

పశ్చిమ బెంగాల్‌లోని కుర్సియాంగ్ అడవుల్లో మరో అరుదైన నల్ల జింక కనిపించింది. ఈ ఏడాది జనవరిలో డౌ హిల్ ప్రాంతంలో ఓ నల్ల జింకను అటవీ అధికారులు గుర్తించగా, తాజాగా అదే ప్రాంతంలో ట్రెక్కింగ్‌కు వెళ్లిన ఓ పర్యాటకుడికి మరో నల్ల జింక దర్శనమిచ్చింది. దుర్గాపూజ సీజన్ నేపథ్యంలో డార్జిలింగ్, కుర్సియాంగ్ ప్రాంతాలకు పర్యాటకుల రాక పెరిగింది. ఈ క్రమంలో పైన్ చెట్లతో నిండిన డౌ హిల్ అడవుల్లో నల్ల జింకను చూసిన పర్యాటకుడు వెంటనే దాని చిత్రాలను తీశాడు. ఈ అరుదైన దృశ్యాన్ని చూసిన ఇతర పర్యాటకులు కూడా ఆశ్చర్యం, ఆనందం వ్యక్తం చేశారు.

నిపుణుల ప్రకారం, కొన్ని జంతువుల్లో జన్యుపరమైన మార్పుల కారణంగా మెలనిన్ అనే వర్ణద్రవ్యం అధికంగా ఉత్పత్తి కావడంతో వాటి శరీరం నల్లగా కనిపిస్తుంది. చిరుతల్లో ఈ లక్షణం కనిపించినప్పుడు వాటిని బ్లాక్ పాంథర్స్‌గా పిలుస్తారు. బార్కింగ్ డీర్ జాతికి చెందిన జింకల్లోనూ ఇలాంటి మార్పులు సంభవించవచ్చని చెబుతున్నారు. గతంలో కుర్సియాంగ్ డివిజనల్ ఫారెస్ట్ ఆఫీసర్ దేబేశ్ పాండే డౌ హిల్ ప్రాంతంలో నల్ల జింకను గుర్తించి కెమెరాలో బంధించారు. తాజాగా మరో నల్ల జింక కనిపించడంపై ఆయన సంతోషం వ్యక్తం చేశారు. ఇది అటవీ శాఖతో పాటు వన్యప్రాణి ప్రేమికులకు గర్వకారణమని పేర్కొన్నారు.