మూడు నెలల్లో రోహిత్ వేముల తెలంగాణ బిల్లు ముసాయిదా సిద్ధం చేయాలి: భట్టి విక్రమార్క

విశ్వవిద్యాలయాలు, ఉన్నత విద్యాసంస్థల్లో విద్యార్థుల హక్కులను పరిరక్షిస్తూ, కులం లేదా సామాజిక నేపథ్యం ఆధారంగా వివక్షకు తావులేకుండా రూపొందించనున్న ‘రోహిత్ వేముల తెలంగాణ బిల్లు’ ప్రాథమిక ముసాయిదాను మూడు నెలల్లో సిద్ధం చేయాలని ఉప ముఖ్యమంత్రి మల్లు భట్టి విక్రమార్క అధికారులను ఆదేశించారు. ముసాయిదాను తదుపరి పరిశీలన కోసం సీనియర్ సివిల్ సర్వెంట్ల కమిటీకి సమర్పించాలని స్పష్టం చేశారు. తెలంగాణ సచివాలయంలో శుక్రవారం ఆయన అధ్యక్షతన జరిగిన క్యాబినెట్ సబ్ కమిటీ రెండో సమావేశంలో బిల్లు రూపకల్పన విధానం, కమిటీ ఏర్పాటు, న్యాయపరమైన అంశాలు, వివిధ వర్గాలతో సంప్రదింపులపై చర్చించారు. ఈ సమావేశంలో మంత్రులు పొన్నం ప్రభాకర్, అడ్లూరి లక్ష్మణ్ కుమార్ పాల్గొన్నారు.

బిల్లు రూపకల్పనకు షెడ్యూల్డ్ కులాల అభివృద్ధి శాఖ నాయకత్వం వహించాలని భట్టి విక్రమార్క సూచించారు. న్యాయ, విద్యా, హోంశాఖలతో పాటు అవసరమైన సంబంధిత సంస్థల భాగస్వామ్యాన్ని పరిశీలించాలని, విద్యార్థులు, అధ్యాపకులు, న్యాయ నిపుణులు, పౌర సమాజ సంస్థలు, విద్యారంగ నిపుణుల అభిప్రాయాలను పరిగణనలోకి తీసుకోవాలని ఆదేశించారు. న్యాయపరమైన, సాంకేతిక అంశాల్లో నల్సార్ న్యాయ విశ్వవిద్యాలయం సహకారం తీసుకునే అంశంపైనా సమావేశంలో చర్చించారు. విద్యార్థులకు సమాన అవకాశాలు కల్పించడం, వివక్షను నిరోధించడం, ఉన్నత విద్యాసంస్థల్లో న్యాయబద్ధమైన వాతావరణాన్ని బలోపేతం చేయడం ప్రతిపాదిత చట్టం ప్రధాన లక్ష్యాలుగా ఉండాలని సమావేశం అభిప్రాయపడింది.