నేడు వారణాసి, భువనేశ్వర్‌లో ప్రధాని మోదీ పర్యటన

ప్రధాని నరేంద్ర మోదీ నేడు ఉత్తరప్రదేశ్, ఒడిశా రాష్ట్రాల్లో పర్యటించనున్నారు. ఈ సందర్భంగా వారణాసి, భువనేశ్వర్‌లో నిర్వహించే పలు కీలక కార్యక్రమాల్లో ఆయన పాల్గొననున్నారు. వారణాసిలోని నమో ఘాట్ వద్ద “వింగ్స్ ఓవర్ గంగా” థీమ్‌తో ప్రత్యేక వైమానిక ప్రదర్శన నిర్వహించనున్నారు. భారత వైమానిక దళం 94వ వార్షికోత్సవం సందర్భంగా ఈ కార్యక్రమాన్ని ఏర్పాటు చేస్తున్నారు. దేశ రక్షణలో వైమానిక దళం పోషిస్తున్న పాత్రను, దాని సామర్థ్యాలను చాటిచెప్పేలా ఈ ప్రదర్శన ఉండనుంది. గంగా నది పరిసరాల్లో నిర్వహించే ఈ కార్యక్రమం ప్రత్యేక ఆకర్షణగా నిలవనుంది.

వారణాసి పర్యటనలో భాగంగా ప్రధాని మోదీ నూతన గార్మెంట్ తయారీ కేంద్రాన్ని కూడా ప్రారంభించనున్నారు. ముఖ్యంగా మహిళల ఆధ్వర్యంలో నడిచే వస్త్ర తయారీ పరిశ్రమకు ప్రోత్సాహం అందించడం, స్థానికంగా ఉత్పత్తి సామర్థ్యాన్ని పెంచడం ఈ కేంద్రం లక్ష్యంగా భావిస్తున్నారు. వారణాసిలో తయారయ్యే వస్త్ర ఉత్పత్తులను అంతర్జాతీయ మార్కెట్లతో అనుసంధానించడం ద్వారా వాటికి విస్తృత మార్కెట్ అవకాశాలు కల్పించనున్నారు. అనంతరం భువనేశ్వర్‌లో రిజర్వ్ బ్యాంక్ ఆఫ్ ఇండియా (ఆర్‌బీఐ) నూతన డేటా సెంటర్‌ను ప్రధాని ప్రారంభించనున్నారు. ఈ కేంద్రం ఆర్‌బీఐ డేటా నిర్వహణ వ్యవస్థను మరింత బలోపేతం చేయడంలో, సాంకేతిక మౌలిక సదుపాయాలను మెరుగుపరచడంలో కీలక పాత్ర పోషించనుంది.