దేశమంతా జంతర్ మంతర్‌గా మారొచ్చు – ప్రకాశ్ రాజ్

రానున్న రోజుల్లో దేశవ్యాప్తంగా నిరసనలు విస్తరించే అవకాశం ఉందని నటుడు ప్రకాశ్ రాజ్ అన్నారు. దేశంలోని ప్రతి ప్రాంతం, ప్రతి నగరం జంతర్ మంతర్‌గా మారవచ్చని వ్యాఖ్యానించారు. తిరువనంతపురంలో మీడియాతో మాట్లాడిన ఆయన, కేంద్ర ఎన్నికల ప్రధాన కమిషనర్‌గా జ్ఞానేశ్ కుమార్ ఎంపిక ప్రక్రియ, ఆ నిర్ణయం వెనుక అనుసరించిన విధానాన్ని ప్రజలు అర్థం చేసుకోవాలని పిలుపునిచ్చారు. ఈ వ్యవహారంలో కేంద్ర ప్రభుత్వం రెడ్‌హ్యాండెడ్‌గా దొరికిపోయిందంటూ వ్యంగ్యాస్త్రాలు సంధించారు.

దేశంలో పెరుగుతున్న అసంతృప్తిపై స్పందిస్తూ, విద్యార్థులు ఇప్పటికే ఉద్యమాలు ప్రారంభించారని ప్రకాశ్ రాజ్ పేర్కొన్నారు. వారి నిరసనలకు రైతులు, పౌర సమాజం కూడా మద్దతుగా గొంతు కలుపుతున్నారని తెలిపారు. ప్రస్తుత పరిణామాలు దేశవ్యాప్తంగా ప్రజా నిరసనలు, పౌర హక్కుల కోసం జరిగే పోరాటాలు మళ్లీ ఊపందుకుంటున్నాయనే సంకేతాలను ఇస్తున్నాయని ఆయన అభిప్రాయపడ్డారు.