అమెరికాలో హిందూ ఆలయంపై దాడికి కుట్ర.. తృటిలో తప్పిన ప్రమాదం

అమెరికాలోని ఇల్లినాయిస్ రాష్ట్రం అరోరాలో హిందూ దేవాలయంపై కాల్పులకు యత్నించిన ఘటనపై భారతీయ-అమెరికన్ కాంగ్రెస్ సభ్యుడు రాజా కృష్ణమూర్తి స్పందించారు. హిందువులపై ద్వేషంతో పలువురిని హతమార్చాలనే ఉద్దేశంతో ఓ యువకుడు తుపాకీతో ఆలయంలోకి ప్రవేశించిన సమయంలో తాను కుటుంబ సభ్యులతో కలిసి అక్కడే పూజలో ఉన్నట్లు తెలిపారు. అయితే, చివరి నిమిషంలో తుపాకీలో సాంకేతిక సమస్య తలెత్తడంతో పెద్ద ప్రమాదం తప్పిందని కథనంలో పేర్కొన్నారు. ఈ ఘటన అమెరికాలో భారతీయులపై ద్వేషం, శ్వేతజాతి ఆధిపత్య భావజాలం వల్ల తలెత్తుతున్న ముప్పును సూచిస్తోందని రాజా కృష్ణమూర్తి ఆందోళన వ్యక్తం చేశారు. పలువురు అమెరికా ప్రజాప్రతినిధులు, నాయకులు, పౌర సమాజ ప్రతినిధులు ఈ దాడి యత్నాన్ని ఖండించారు. ప్రార్థనా మందిరాల భద్రతను బలోపేతం చేయాలని, మతపరమైన వివక్షను అరికట్టేందుకు చర్యలు తీసుకోవాలని కోరారు.

ఈ ఘటనకు సంబంధించి అలెగ్జాండ్రోస్ పాపొరకీస్ అనే 19 ఏళ్ల యువకుడు గత రెండేళ్లుగా హిందువులపై దాడికి ప్రణాళికలు రచించినట్లు అధికారులు వెల్లడించినట్లు కథనం పేర్కొంది. ఆదివారం అరోరాలోని హిందూ ఆలయాన్ని లక్ష్యంగా చేసుకుని అతడు అక్కడికి వెళ్లినప్పటికీ, తుపాకీలో సమస్య కారణంగా కాల్పులు జరపలేకపోయినట్లు సమాచారం. అమెరికాలో జాతి, మతపరమైన ద్వేషానికి చోటు ఉండకూడదని న్యూయార్క్ సెనేటర్ చక్ షుమర్ పేర్కొన్నారు. ప్రతి ఒక్కరూ తమ మతం, జాతితో సంబంధం లేకుండా స్వేచ్ఛగా జీవించే పరిస్థితులు ఉండాలని అన్నారు. కాంగ్రెస్ సభ్యుడు బ్రాడ్ షెర్మన్ సహా పలువురు ప్రజాప్రతినిధులు ఈ ఘటనను ఖండిస్తూ, మైనారిటీల ప్రార్థనా స్థలాలకు రక్షణ కల్పించాలని పిలుపునిచ్చారు.