డిండి ప్రాజెక్టుకు నీటి తరలింపుపై పాలమూరు నేతల అభ్యంతరం.. ఉత్తమ్‌తో కీలక భేటీ

పాలమూరు నుంచి డిండి ప్రాజెక్టుకు నీటిని తరలించే ప్రతిపాదనను నిలిపివేయాలని జిల్లా ప్రజాప్రతినిధులు తెలంగాణ మంత్రి ఉత్తమ్‌కుమార్‌ రెడ్డికి విజ్ఞప్తి చేశారు. ఈ అంశంపై మంత్రి జూపల్లి కృష్ణారావు, ఎంపీ మల్లు రవి, జిల్లాకు చెందిన ఎమ్మెల్యేలు, శాసనమండలి ఛైర్మన్‌ గుత్తా సుఖేందర్‌రెడ్డి, జానారెడ్డి తదితరులు గురువారం ఉత్తమ్‌కుమార్‌ రెడ్డితో సమావేశమయ్యారు. దాదాపు గంటన్నరపాటు జరిగిన ఈ భేటీలో డిండి ప్రాజెక్టుకు నీటి తరలింపు వల్ల ఎదురయ్యే సమస్యలను ఆయన దృష్టికి తీసుకెళ్లారు.

డిండి ప్రాజెక్టుకు ఏదుల నుంచి కాకుండా ప్రత్యామ్నాయ మార్గంలో నీటిని తరలించాలని ప్రజాప్రతినిధులు కోరారు. డిండి ప్రాజెక్టుకు నీరు అందించడంపై తమకు వ్యతిరేకత లేదని, అయితే ఏదుల నుంచి నీటిని తీసుకుంటే పాలమూరు ఆయకట్టుకు ఇబ్బందులు ఎదురయ్యే అవకాశం ఉందని వివరించారు. ఈ అంశంపై అధికారులతో చర్చించి, అందరికీ ఆమోదయోగ్యమైన నిర్ణయం తీసుకుంటామని ఉత్తమ్‌కుమార్‌ రెడ్డి హామీ ఇచ్చారు.