ప్రధాన ఎన్నికల కమిషనర్‌ రాజీనామాకు డిమాండ్‌.. ఢిల్లీలో ఎన్‌ఎస్‌యూఐ ర్యాలీ

ప్రధాన ఎన్నికల కమిషనర్‌ (సీఈసీ) జ్ఞానేశ్‌ కుమార్‌ తక్షణమే రాజీనామా చేయాలని డిమాండ్‌ చేస్తూ కాంగ్రెస్‌ అనుబంధ విద్యార్థి సంఘం ఎన్‌ఎస్‌యూఐ ఆదివారం ఢిల్లీలో నిరసన ర్యాలీ నిర్వహించింది. రైసినా రోడ్డులోని ఎన్‌ఎస్‌యూఐ ప్రధాన కార్యాలయం నుంచి ప్రారంభమైన ఈ ర్యాలీ జంతర్‌ మంతర్‌ వరకు సాగింది. ఎన్‌ఎస్‌యూఐ జాతీయ అధ్యక్షుడు వినోద్‌ జాకఢ్‌ ఈ నిరసనకు నాయకత్వం వహించారు.

13 కోట్ల మంది ఓటర్ల పేర్లను అక్రమంగా తొలగించారంటూ నిరసనకారులు ఆరోపించారు. ఈ చర్య ప్రజాస్వామ్యంపై దాడి అని పేర్కొంటూ తమ వేళ్లకు కట్లు కట్టుకుని నిరసన తెలిపారు. జంతర్‌ మంతర్‌ను నిరసన ప్రదర్శనలకు కేటాయించిన ప్రాంతంగా తిరిగి పునరుద్ధరించాలని డిమాండ్‌ చేశారు. ఈ క్రమంలో ఢిల్లీ పోలీసులు, సీఆర్పీఎఫ్‌, రాపిడ్‌ యాక్షన్‌ ఫోర్స్‌ బలగాలు బారికేడ్లు ఏర్పాటు చేసి, హెచ్చరికలు జారీ చేశాయి. ముందుకు సాగేందుకు ప్రయత్నించిన ఎన్‌ఎస్‌యూఐ కార్యకర్తలను పోలీసులు అదుపులోకి తీసుకున్నారు.