మంత్రి లోకేశ్‌తో మిజోరం సీఎం భేటీ

మిజోరం ముఖ్యమంత్రి లాల్దుహోమా సోమవారం ఉండవల్లిలోని సీఎం క్యాంపు కార్యాలయంలో ఏపీ మంత్రి నారా లోకేశ్‌తో సమావేశమయ్యారు. తొలుత అక్కడికి చేరుకున్న లాల్దుహోమాకు లోకేశ్ స్వాగతం పలికారు. శాలువాతో సత్కరించి ప్రత్యేక జ్ఞాపికను అందజేశారు. పలు కార్యక్రమాల్లో పాల్గొనేందుకు ఆంధ్రప్రదేశ్‌కు వచ్చిన మిజోరం సీఎం.. లోకేశ్‌తో భేటీలో పలు కీలక అంశాలపై చర్చించారు.

మరోవైపు, ఆంధ్రప్రదేశ్‌లో పట్టణ స్థానిక సంస్థల ఎన్నికలకు రికార్డు స్థాయిలో 22,800కు పైగా నామినేషన్లు దాఖలయ్యాయని మంత్రి నారా లోకేశ్ తెలిపారు. రాష్ట్రంలోని వివిధ రాజకీయ పార్టీలు, వర్గాల నుంచి అభ్యర్థులు ఎన్నికల్లో పోటీ చేసేందుకు ముందుకు వచ్చారని పేర్కొన్నారు. ఏపీలో ప్రజాస్వామ్యం సజీవంగా ఉందని ఎక్స్ వేదికగా వెల్లడించారు. పోలింగ్ ప్రారంభం కాకముందే అక్రమాలు జరిగాయని ఆరోపణలు చేసేవారు ప్రజలను నేరుగా ఎదుర్కోవాలని, ఎన్నికల్లో గెలుపు పత్రికా సమావేశాల్లో కాకుండా క్షేత్రస్థాయిలో నిర్ణయమవుతుందని అన్నారు. ప్రజలే ఎన్నికల ఫలితాలను నిర్ణయిస్తారని స్పష్టం చేశారు.