దేవరగట్టు బన్నీ ఉత్సవంలో హింసాత్మక ఘటన.. ఒకరు మృతి, 100 మందికి పైగా గాయాలు

కర్నూలు జిల్లా దేవరగట్టులో నిర్వహించిన మాల మల్లేశ్వర స్వామి బన్నీ ఉత్సవం సందర్భంగా హింసాత్మక ఘటన చోటుచేసుకుంది. ఉత్సవ విగ్రహాల ఊరేగింపులో భాగంగా నిర్వహించే సంప్రదాయ కర్రల సమరం తీవ్ర ఘర్షణకు దారితీసింది. ఈ క్రమంలో ఇరువర్గాల మధ్య దాడులు జరిగినట్లు సమాచారం. కర్రలు, రాళ్లు, అగ్గి దివిటీలతో పరస్పరం దాడులు చేసుకోవడంతో పలువురు గాయపడ్డారు. ఈ ఘటనలో ఒకరు మృతి చెందగా, 100 మందికి పైగా గాయపడినట్లు తెలుస్తోంది.

మృతుడిని ఆలూరుకు చెందిన పోతురాజు (32)గా గుర్తించారు. గాయపడిన వారిలో 18 మంది పరిస్థితి విషమంగా ఉన్నట్లు సమాచారం. క్షతగాత్రులను మెరుగైన చికిత్స కోసం ఆదోని, ఆలూరు ఆస్పత్రులకు తరలించారు. ప్రతి ఏడాది పెద్ద సంఖ్యలో భక్తులు పాల్గొనే ఈ ఉత్సవంలో చోటుచేసుకున్న హింసాత్మక ఘటన ఆందోళన కలిగిస్తోంది. గాయపడిన వారి ఆరోగ్య పరిస్థితి, ఘటనకు సంబంధించిన మరిన్ని వివరాలు అధికారిక సమాచారం వెలువడిన తర్వాత స్పష్టమయ్యే అవకాశం ఉంది.