సీఎం విజయ్‌ను కలిసిన కమల్‌హాసన్‌

తమిళనాడు నూతన ముఖ్యమంత్రి విజయ్‌ను సినీ నటుడు కమల్‌హాసన్‌ మర్యాదపూర్వకంగా కలిశారు. ఈ సందర్భంగా ఆయనకు హృదయపూర్వక శుభాకాంక్షలు తెలియజేశారు. ఈ భేటీకి సంబంధించిన ఫొటోలను కమల్‌హాసన్‌ ఎక్స్‌ వేదికగా పంచుకున్నారు.

ఈ సమావేశంలో తమిళనాడు అభివృద్ధి కోసం సీఎం విజయ్‌ తన ఆలోచనలను పంచుకున్నారని కమల్‌హాసన్‌ తెలిపారు. ఆయన ప్రదర్శించిన వినయం, ఆప్యాయత తనను ఆకట్టుకుందని పేర్కొన్నారు. అలాగే తమిళ సినీ పరిశ్రమ ఎదుర్కొంటున్న సమస్యలను సీఎం దృష్టికి తీసుకెళ్లినట్లు చెప్పారు.

సినీ పరిశ్రమ అభివృద్ధికి ప్రభుత్వ సహాయం అవసరమని కమల్‌హాసన్‌ విజ్ఞప్తి చేశారు. ఈ సందర్భంగా ఆయన ఆరు ముఖ్య డిమాండ్లను సీఎం ముందు ఉంచినట్లు తెలిపారు. అయితే ఆ డిమాండ్ల వివరాలను మాత్రం వెల్లడించలేదు. ‘గాంధీ బిఫోర్‌ ఇండియా’తో పాటు మరో పుస్తకాన్ని కూడా సీఎం విజయ్‌కు ఆయన బహూకరించారు.