ఎన్నికల నిబంధనలు పాటించాలి.. ప్రజలకు కడప పోలీసుల సూచన

వైఎస్సార్ కడప జిల్లాలో స్థానిక సంస్థల ఎన్నికల నామినేషన్ల ప్రక్రియ నేపథ్యంలో పోలీసులు ప్రజలకు విస్తృతంగా అవగాహన కల్పిస్తున్నారు. జిల్లా ఎస్పీ షెల్కే నచికేత్ విశ్వనాథ్, ఐపీఎస్ ఆదేశాల మేరకు మైకుల ద్వారా ఎన్నికల నిబంధనలు, నిషేధాజ్ఞల గురించి వివరిస్తున్నారు. నామినేషన్ కేంద్రాల పరిసరాల్లో శాంతిభద్రతలను కాపాడేందుకు అమలులో ఉన్న సెక్షన్ 144, పోలీస్ యాక్ట్ 30 నిబంధనలపై ప్రజలకు అవగాహన కల్పిస్తున్నారు. అనుమతి లేకుండా సభలు, సమావేశాలు, ఊరేగింపులు నిర్వహించరాదని పోలీసులు సూచిస్తున్నారు.

ఎన్నికల నామినేషన్ల ప్రక్రియ ప్రశాంతంగా, సజావుగా సాగేందుకు ప్రజలు పోలీసులకు సహకరించాలని అధికారులు విజ్ఞప్తి చేస్తున్నారు. నిబంధనలకు విరుద్ధంగా గుంపులుగా చేరడం, శాంతిభద్రతలకు విఘాతం కలిగించే చర్యలకు పాల్పడటం చేయరాదని స్పష్టం చేస్తున్నారు. ఎన్నికల నియమావళిని ఉల్లంఘించిన వారిపై చట్టప్రకారం చర్యలు తీసుకుంటామని హెచ్చరిస్తున్నారు. ఎన్నికల సమయంలో ఎలాంటి అవాంఛనీయ ఘటనలు జరగకుండా ముందస్తు చర్యల్లో భాగంగా ఈ అవగాహన కార్యక్రమాన్ని చేపట్టారు.