ఇరాన్‌పై మళ్లీ దాడులు చేస్తే తీవ్ర పరిణామాలే.. ట్రంప్‌, నెతన్యాహుకు అరాగ్చీ వార్నింగ్

ఇరాన్‌పై మరోసారి సైనిక దాడులు చేసేందుకు అమెరికా అధ్యక్షుడు డొనాల్డ్‌ ట్రంప్‌, ఇజ్రాయెల్‌ ప్రధాని బెంజమిన్‌ నెతన్యాహు రహస్య చర్చలు జరుపుతున్నట్లు వార్తలు వెలువడుతున్నాయి. ఈ నేపథ్యంలో ఇరాన్‌ విదేశాంగ మంత్రి అబ్బాస్‌ అరాగ్చీ కీలక వ్యాఖ్యలు చేశారు. గతంలో అమెరికా, ఇజ్రాయెల్‌ దాడులను తమ దేశం సమర్థంగా ఎదుర్కొందని, మరోసారి దాడులకు దిగితే అంతకంటే బలంగా ప్రతిఘటిస్తామని హెచ్చరించారు. తమ అదృష్టాన్ని మరోసారి పరీక్షించుకోవాలనుకుంటే ప్రయత్నించవచ్చని, అయితే ఇరాన్‌కు కూడా ఇంకా పూర్తికాని పనులు చాలా ఉన్నాయని వ్యాఖ్యానించారు. ఇరాన్‌పై మళ్లీ సైనిక చర్యలకు దిగితే తీవ్ర పరిణామాలు ఎదుర్కోవాల్సి వస్తుందని స్పష్టం చేశారు.

మరోవైపు, స్వదేశంలో చట్టపరమైన సమస్యలను తప్పించుకునేందుకు నెతన్యాహు అమెరికాను మరో సైనిక ఘర్షణలోకి లాగేందుకు ప్రయత్నిస్తున్నారని అరాగ్చీ ఆరోపించారు. తనపై ఉన్న కేసుల్లో జైలు శిక్షను తప్పించుకునేందుకు నెతన్యాహు ట్రంప్‌ను ఉపయోగించుకుంటున్నారని విమర్శించారు. ఈ పరిణామాల ప్రభావాన్ని ఇజ్రాయెల్‌తో పాటు అమెరికా కూడా ఎదుర్కోవాల్సి వస్తుందని హెచ్చరించారు. ఇదిలా ఉండగా, అక్టోబర్‌ 27న జరగనున్న ఇజ్రాయెల్‌ పార్లమెంటరీ ఎన్నికలకు ముందు ట్రంప్‌ నెతన్యాహుకు మద్దతు ప్రకటించారు. ఇరాన్‌తో ఘర్షణను సమర్థంగా ఎదుర్కొని ఇజ్రాయెల్‌లో శాంతిని నెలకొల్పారని ప్రశంసించారు. నెతన్యాహు కాకుండా మరొకరిని ప్రధానిగా ఎన్నుకుంటే అమెరికా జోక్యం చేసుకోవాల్సి రావచ్చని ఇజ్రాయెల్‌ ప్రజలను హెచ్చరించారు. ఇరాన్‌ తన వైఖరిని మార్చుకోకపోతే ఆ దేశంపై కఠిన చర్యలు తీసుకుంటామని ట్రంప్‌ వ్యాఖ్యానించారు.