రైతుల అభ్యున్నతే లక్ష్యంగా విత్తన రంగంలో ఆవిష్కరణలు జరగాలి: గవర్నర్

దేశ ఆర్థిక వ్యవస్థకు రైతులే వెన్నెముకని, వారి అభ్యున్నతే లక్ష్యంగా విత్తన రంగంలో నూతన ఆవిష్కరణలు జరగాలని తెలంగాణ గవర్నర్ శివప్రతాప్ శుక్లా అన్నారు. నూజివీడు సీడ్స్ లిమిటెడ్ వ్యవస్థాపకుడు దివంగత మండవ వెంకట్రామయ్య వ్యవసాయ రంగానికి అందించిన సేవలు చిరస్మరణీయమని కొనియాడారు. మేడ్చల్–మల్కాజిగిరి జిల్లా కండ్లకోయలో గురువారం నిర్వహించిన మండవ వెంకట్రామయ్య స్మారక కార్యక్రమంలో గవర్నర్ ముఖ్య అతిథిగా పాల్గొన్నారు. ఈ సందర్భంగా ఆయన మొక్క నాటి, మండవ వెంకట్రామయ్య చిత్రపటానికి పూలమాలలు వేసి నివాళులర్పించారు. నాణ్యత, విశ్వసనీయత, నూతన ఆవిష్కరణలకు ప్రాధాన్యమిస్తూ విత్తన రంగంలో మండవ వెంకట్రామయ్య విశేష కృషి చేశారని, ఆయన దూరదృష్టి వ్యవసాయ రంగానికి కొత్త దిశను చూపిందని గవర్నర్ పేర్కొన్నారు.

రైతుల శ్రమ, అంకితభావం, పట్టుదల దేశంలో ఆహార భద్రతకు పునాది అని గవర్నర్ శివప్రతాప్ శుక్లా అన్నారు. వ్యవసాయ ఉత్పాదకతను పెంచడంతోపాటు రైతుల ఆర్థిక స్థితిగతులను మెరుగుపరిచేందుకు ఆధునిక సాంకేతిక పరిజ్ఞానం, శాస్త్రీయ పరిశోధనలు, నాణ్యమైన విత్తనాల అభివృద్ధికి ప్రాధాన్యమివ్వాలని సూచించారు. మండవ వెంకట్రామయ్య ఆశయాలను కొనసాగిస్తూ నూజివీడు సీడ్స్ సంస్థ వ్యవసాయ పరిశోధనలు, నూతన ఆవిష్కరణలు, రైతుల సంక్షేమం కోసం కృషి చేయాలని ఆకాంక్షించారు. యువత ఆయన జీవితం నుంచి స్ఫూర్తి పొంది, జ్ఞానం, కఠోర శ్రమ, నిజాయితీతో దేశాభివృద్ధిలో భాగస్వాములు కావాలని పిలుపునిచ్చారు. ఈ కార్యక్రమంలో ఆంధ్రప్రదేశ్ మాజీ విద్యాశాఖ మంత్రి మండవ వెంకటేశ్వరరావు, ఇక్రిశాట్ డైరెక్టర్ జనరల్ డాక్టర్ హిమాంశు పాఠక్, నూజివీడు సీడ్స్ లిమిటెడ్ చైర్మన్, మేనేజింగ్ డైరెక్టర్ ఎం. ప్రభాకరరావు, మండవ కుటుంబ సభ్యులు, సంస్థ ప్రతినిధులు, ఇతర ప్రముఖులు పాల్గొన్నారు.