భారత రక్షణ రంగానికి మరింత బలం.. బీఈఎల్‌తో కేంద్రం కీలక ఒప్పందం

త్రివిధ దళాల ఆయుధ సామర్థ్యాన్ని మరింత బలోపేతం చేసే దిశగా కేంద్ర ప్రభుత్వం కీలక అడుగు వేసింది. తక్కువ ఎత్తులో ప్రయాణించే లక్ష్యాలను గుర్తించగల తేలికపాటి రాడార్ల కొనుగోలు కోసం భారత్‌ ఎలక్ట్రానిక్స్‌ లిమిటెడ్‌ (బీఈఎల్‌)తో సుమారు రూ.770 కోట్ల ఒప్పందం కుదుర్చుకుంది. దిల్లీలో రక్షణ శాఖ కార్యదర్శి రాజేశ్‌ కుమార్‌ సింగ్‌ సమక్షంలో ఈ ఒప్పందం జరిగింది. ఆధునిక రక్షణ వ్యవస్థలను మరింత పటిష్ఠం చేయడంలో భాగంగా ఈ రాడార్లను సాయుధ దళాలకు అందుబాటులోకి తీసుకురానున్నారు.

ఈ రాడార్లు యుద్ధ విమానాలు, చిన్న, అతి చిన్న డ్రోన్లను గుర్తించి వాటి కదలికలను పర్యవేక్షించగల సామర్థ్యాన్ని కలిగి ఉన్నాయి. మారుతున్న యుద్ధ పరిస్థితుల్లో గగనతల నిఘా, ముప్పులను ముందుగానే గుర్తించడం వంటి అంశాల్లో ఇవి కీలకంగా ఉపయోగపడనున్నాయి. 2047 నాటికి వికసిత్‌ భారత్‌ లక్ష్యాన్ని సాధించే దిశగా దేశీయ రక్షణ రంగాన్ని బలోపేతం చేయడంలో ఈ ఒప్పందం భాగమని రక్షణ శాఖ వివరించింది.