ఢిల్లీలో వాతావరణ శాఖ రెడ్ అలర్ట్..

దేశ రాజధాని ఢిల్లీలో భారీ వర్షాలు, ఉరుములు, మెరుపులతో కూడిన ప్రతికూల వాతావరణం ఏర్పడే అవకాశం ఉందని భారత వాతావరణ శాఖ (IMD) హెచ్చరించింది. ఢిల్లీలోని మొత్తం 11 జిల్లాలకు రెడ్ అలర్ట్ జారీ చేసింది. ఈరోజు ఉదయం 9 గంటల వరకు భారీ వర్షాలతో పాటు ఉరుములు, మెరుపులు, గంటకు 60 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది. మరోవైపు హర్యానా, ఉత్తరప్రదేశ్‌లోని కొన్ని ప్రాంతాలకు ఆరెంజ్ అలర్ట్ ప్రకటించింది.

ప్రతికూల వాతావరణ పరిస్థితుల నేపథ్యంలో ప్రజలు అప్రమత్తంగా ఉండాలని, అవసరమైన జాగ్రత్తలు తీసుకోవాలని అధికారులు సూచిస్తున్నారు. భారీ వర్షాలు కురిసే సమయంలో అత్యవసరమైతే తప్ప ప్రయాణాలను వాయిదా వేసుకోవాలని, ఉరుములు, మెరుపులు సంభవించే సమయంలో బహిరంగ ప్రదేశాల్లో ఉండకూడదని సూచించారు. వాతావరణ శాఖ జారీ చేసే తాజా హెచ్చరికలు, భద్రతా సూచనలను పాటించాలని ప్రజలకు విజ్ఞప్తి చేశారు. భారీ వర్షాలు, బలమైన గాలుల కారణంగా ట్రాఫిక్‌కు అంతరాయాలు ఏర్పడే అవకాశం ఉన్నందున ప్రయాణికులు జాగ్రత్తగా ఉండాలి.