నీటి వృథాపై జలమండలి ఫైర్‌..జూబ్లీహిల్స్‌ పబ్‌కు భారీ జరిమానా

హైదరాబాద్‌లో తాగునీటి దుర్వినియోగంపై జలమండలి అధికారులు చర్యలు చేపట్టారు. జూబ్లీహిల్స్‌లోని ఫోర్ ఫాదర్స్ పబ్‌లో నీటిని వృథా చేస్తున్నారంటూ అందిన ఫిర్యాదుతో అధికారులు తనిఖీలు నిర్వహించారు. జూబ్లీహిల్స్ సర్కిల్ పరిధిలోని రోడ్ నంబర్ 45, ప్లాట్ నంబర్ 872లో ఉన్న ఈ పబ్‌లో నీటి దుర్వినియోగం జరిగినట్లు గుర్తించిన అనంతరం యాజమాన్యానికి రూ.20 వేల జరిమానా విధించారు. అంతేకాకుండా తాగునీటి కనెక్షన్‌ను తొలగించడంతో పాటు జలమండలి ఫిల్లింగ్ స్టేషన్ నుంచి కమర్షియల్ ట్యాంకర్ల ద్వారా అందించే నీటి సరఫరాను కూడా నిలిపివేశారు.

వేసవి సమీపిస్తున్న నేపథ్యంలో ప్రతి నీటి చుక్కనూ పొదుపుగా వినియోగించాలని జలమండలి ప్రజలకు సూచించింది. హోటళ్లు, రెస్టారెంట్లు, పబ్‌లు, ఇతర వాణిజ్య సంస్థలు తాగునీటిని వృథా చేయకుండా బాధ్యతగా వ్యవహరించాలని హెచ్చరించింది. నీటి వృథాను గుర్తిస్తే 99499 30003 వాట్సాప్ నంబర్‌కు ఫిర్యాదు చేయవచ్చని, 155313 కస్టమర్ కేర్ నంబర్‌ను కూడా సంప్రదించవచ్చని తెలిపింది. ఫిర్యాదుతో పాటు ఫొటోలు, వీడియోలు, ఘటన స్థలం, పూర్తి చిరునామా వంటి వివరాలను అందించవచ్చని, ఉల్లంఘనలు నిర్ధారణ అయితే చర్యలు తీసుకుంటామని స్పష్టం చేసింది. సమాచారం అందించిన వారి వివరాలను గోప్యంగా ఉంచుతామని పేర్కొంది.