గ్లోబల్ నాలెడ్జ్ హబ్‌గా హైదరాబాద్!

తెలంగాణ యువతకు ప్రపంచస్థాయి విద్యా అవకాశాలు అందించే లక్ష్యంతో హైదరాబాద్‌ను గ్లోబల్ నాలెడ్జ్ హబ్‌గా అభివృద్ధి చేస్తున్నామని ముఖ్యమంత్రి రేవంత్ రెడ్డి తెలిపారు. యూనివర్సిటీ ఆఫ్ లండన్, నార్త్‌ఈస్టర్న్ యూనివర్సిటీ హైదరాబాద్‌లో ఆఫ్‌షోర్ క్యాంపస్‌లు ఏర్పాటు చేయనున్నాయని పేర్కొన్నారు. హార్వర్డ్ యూనివర్సిటీతో పాటు దాని అనుబంధ పాఠశాలలు తెలంగాణలో ఎంపిక చేసిన కోర్సులు, కార్యక్రమాలు అందించేందుకు ఆసక్తి చూపుతున్నాయని తెలిపారు. యువతకు నైపుణ్యాలు, క్రీడలు, విద్య రంగాల్లో ప్రపంచ సవాళ్లను ఎదుర్కొనే స్థాయి అవకాశాలు కల్పించడమే తన ప్రధాన లక్ష్యమని సీఎం వెల్లడించారు.

ఆక్స్‌ఫర్డ్, కేంబ్రిడ్జ్, ఎస్‌ఓఏఎస్, ఇంపీరియల్ కాలేజ్, లండన్ బిజినెస్ స్కూల్, లండన్ స్కూల్ ఆఫ్ ఎకనామిక్స్‌తో జరిగిన చర్చలు సానుకూల ఫలితాలు ఇచ్చాయని రేవంత్ రెడ్డి తెలిపారు. అలాగే ఎంఐటీతో పాటు పలు ప్రముఖ అమెరికన్ విద్యాసంస్థలతో చర్చలు కూడా సానుకూలంగా సాగాయని పేర్కొన్నారు. విద్యా కోర్సులు, సర్టిఫికేషన్ ప్రోగ్రామ్‌లు, సంయుక్త పరిశోధనలు, సెంటర్స్ ఆఫ్ ఎక్సలెన్స్ ఏర్పాటు, వివిధ వృత్తి రంగాల వారికి ప్రత్యేక కార్యక్రమాల ద్వారా హైదరాబాద్‌ను ప్రపంచస్థాయి విద్యా కేంద్రంగా తీర్చిదిద్దనున్నట్లు ఆయన వెల్లడించారు.