తమిళనాడులో భారీ వర్షాలు.. మత్స్యకారులకు అధికారుల హెచ్చరిక

దక్షిణ బంగాళాఖాతంలో ఏర్పడిన అల్పపీడన ద్రోణి ప్రభావంతో తమిళనాడులో భారీ నుంచి అతి భారీ వర్షాలు కురుస్తున్నాయి. చెన్నైలోని మీనంబాకంలో అత్యధికంగా 12 సెంటీమీటర్ల వర్షపాతం నమోదవగా, నుంగంబాకంలో 11 సెంటీమీటర్ల వర్షం కురిసింది. రాష్ట్రంలో మరో మూడు రోజుల పాటు భారీ వర్షాలు కురిసే అవకాశం ఉందని వాతావరణ పరిస్థితులు సూచిస్తున్నాయి. సముద్రంలో అలజడి, ప్రతికూల వాతావరణం నేపథ్యంలో మత్స్యకారులు చేపల వేటకు వెళ్లవద్దని అధికారులు సూచించారు.

మరోవైపు, ఉత్తరాంధ్ర వరకు విస్తరించిన ద్రోణి ప్రభావంతో ఆంధ్రప్రదేశ్‌లోని పలు జిల్లాల్లో వర్షాలు కురిసే అవకాశం ఉంది. నేడు పోలవరం, కోనసీమ, మార్కాపురం జిల్లాల్లో వర్షాలు పడవచ్చని అంచనా వేస్తున్నారు. ప్రకాశం, నెల్లూరు, కడప, చిత్తూరు, తిరుపతి జిల్లాల్లోనూ తేలికపాటి నుంచి మోస్తరు వర్షాలు కురిసే అవకాశం ఉంది. వర్షాల నేపథ్యంలో ప్రజలు అప్రమత్తంగా ఉండాలని, వాతావరణ శాఖ సూచనలను పాటించాలని అధికారులు సూచిస్తున్నారు.