తమిళనాడులో భారీ వర్షాలు.. చెన్నై సహా ఐదు జిల్లాల్లో స్కూళ్లకు సెలవు

తమిళనాడులో భారీ వర్షాలు కురుస్తున్నాయి. రాష్ట్ర రాజధాని చెన్నైలో రాత్రి నుంచి ఎడతెరిపి లేకుండా వర్షం పడుతోంది. దీంతో నగరంలోని పలు ప్రాంతాలు జలమయమయ్యాయి. సాలిగ్రామం, టి.నగర్, వలసరవాకం, గిండి ప్రాంతాల్లో రహదారులపై వర్షపు నీరు నిలిచిపోయింది. దీంతో స్థానికులు, వాహనదారులు ఇబ్బందులు ఎదుర్కొంటున్నారు. భారీ వర్షాల నేపథ్యంలో జనజీవనం ప్రభావితమైంది.

మరోవైపు, వర్షాల కారణంగా చెన్నైతో పాటు తిరువళ్లూరు, కాంచీపురం, చెంగల్పట్టు, రాణిపేట జిల్లాల్లో విద్యాసంస్థలకు సెలవు ప్రకటించారు. నిరంతర వర్షాలతో లోతట్టు ప్రాంతాల్లో నీరు చేరడంతో ప్రజలు అప్రమత్తంగా ఉండాల్సిన పరిస్థితి నెలకొంది. వర్షాల ప్రభావంతో రహదారులపై నీరు నిలిచే అవకాశం ఉన్నందున ప్రయాణికులు జాగ్రత్తగా వ్యవహరించాలని సూచిస్తున్నారు.