పోలీసు నియామకాల్లో వయోపరిమితి పెంచుతూ జీవో విడుదల చేసిన ప్రభుత్వం

తెలంగాణలో కానిస్టేబుల్ ఉద్యోగాలకు సిద్ధమవుతున్న నిరుద్యోగులకు ప్రభుత్వం శుభవార్త చెప్పింది. కానిస్టేబుల్ పోస్టులకు దరఖాస్తు చేసుకునే అభ్యర్థుల వయోపరిమితిని మరో మూడేళ్లు పెంచింది. ఇప్పటికే ఇచ్చిన ఏడేళ్ల వయోసడలింపుకు అదనంగా తాజాగా మరో మూడేళ్లు సడలింపు ఇవ్వడంతో మొత్తం 10 ఏళ్ల వయోసడలింపు లభించనుంది. దీంతో కానిస్టేబుల్ పోస్టులకు గరిష్ఠ వయోపరిమితి 32 ఏళ్లకు చేరింది. వయసు కారణంగా ఇప్పటివరకు పోలీసు ఉద్యోగాలకు దరఖాస్తు చేసుకోలేకపోయిన అభ్యర్థులకు ఈ నిర్ణయం ఊరటనివ్వనుంది.

తెలంగాణ స్టేట్ లెవెల్ పోలీస్ రిక్రూట్‌మెంట్ బోర్డు నిబంధనలకు అనుగుణంగా కొత్త వయోపరిమితిని అమలు చేస్తూ ప్రభుత్వ ప్రధాన కార్యదర్శి సంజయ్ జాజు ఉత్తర్వులు జారీ చేశారు. పోలీస్, ఫైర్, జైళ్లు, ఎస్‌పీఎఫ్ విభాగాల్లోని కానిస్టేబుల్ పోస్టులకు ఈ వయోసడలింపు వర్తించనుంది. అయితే పోలీస్ శాఖలోని పీసీ డ్రైవర్ పోస్టులకు ఈ సడలింపు వర్తించదు. జులై 29న పలు విభాగాల్లో నాలుగు నోటిఫికేషన్లు విడుదల కాగా, పోలీస్ నియామక మండలి ఇప్పటికే దరఖాస్తు గడువును పొడిగించింది. ఈ నెల 16 వరకు అభ్యర్థులు దరఖాస్తు చేసుకునే అవకాశం ఉంది.