పోలవరం వద్ద మారిన గోదావరి జలాల రంగు

పోలవరం వద్ద గోదావరి నదీ జలాల రంగులో స్పష్టమైన మార్పు కనిపిస్తోంది. వర్షాకాలంలో ఎగువ ప్రాంతాల నుంచి భారీగా వరద నీరు చేరడంతో జూలై నుంచి అక్టోబరు మొదటి వారం వరకు నది జలాలు ఎరుపు, గోధుమ, రాగి ఛాయల్లో కనిపించాయి. అయితే, అక్టోబరు మధ్య నాటికి వరద ప్రవాహం తగ్గడంతో నీరు నీలి రంగులోకి మారింది. నదిలో చోటుచేసుకున్న ఈ మార్పు స్థానికంగా ఆసక్తిని కలిగిస్తోంది.

ఎగువ ప్రాంతాల్లో కురిసిన వర్షాల కారణంగా కొండలు, వాగుల నుంచి మట్టి, ఇసుక రేణువులు గోదావరిలోకి చేరడంతో నీరు రాగి రంగులో కనిపించింది. వర్షాలు తగ్గి వరద ఉద్ధృతి సద్దుమణగడంతో నదిలోకి మట్టి చేరడం తగ్గింది. నీటిలో తేలియాడే మట్టి కణాలు క్రమంగా నదీగర్భంలో అవక్షేపాలుగా పేరుకుపోవడం కూడా రంగు మార్పునకు దోహదం చేసింది. శీలేరు నుంచి గోదావరిలోకి చేరుతున్న నీరు నీలి రంగులో ఉండటంతో పోలవరం స్పిల్‌వే వద్ద ఈ మార్పు మరింత స్పష్టంగా కనిపిస్తోంది. ప్రస్తుతం గోదావరి సాధారణ ప్రవాహ పరిస్థితుల్లో కొనసాగుతోంది.