ఇమ్రాన్ ఖాన్‌కు ఎఫ్‌ఆర్‌ఆర్‌వో షాక్

ప్రధాన ఎన్నికల కమిషనర్‌ (సీఈసీ) జ్ఞానేశ్‌ కుమార్‌కు వ్యతిరేకంగా జరిగిన నిరసనల్లో పాల్గొన్నందుకు బాలీవుడ్‌ నటుడు, ఆమిర్‌ ఖాన్‌ మేనల్లుడు ఇమ్రాన్‌ ఖాన్‌ (43)కు విదేశీయుల ప్రాంతీయ నమోదు కేంద్రం (ఎఫ్‌ఆర్‌ఆర్‌వో) నోటీసులు జారీ చేసినట్లు సమాచారం. భారత్‌ను విడిచి వెళ్లేందుకు అక్టోబరు 28 వరకు గడువు ఇచ్చినట్లు తెలుస్తోంది. ఈ చర్యను ప్రతిపక్షాలు నిరంకుశంగా అభివర్ణించగా, నోటీసులను సవాలు చేస్తూ బాంబే హైకోర్టును ఆశ్రయించాలని ఇమ్రాన్‌ ఖాన్‌ నిర్ణయించుకున్నట్లు సమాచారం.

ఇమ్రాన్‌ ఖాన్‌ అమెరికా పౌరసత్వం కలిగి ఉండటంతో పాటు, భారతీయ మూలాలున్న విదేశీ పౌరులకు ఇచ్చే ఓవర్‌సీస్‌ సిటిజన్‌ ఆఫ్‌ ఇండియా (ఓసీఐ) కార్డును కూడా కలిగి ఉన్నారు. నిరసనల్లో పాల్గొనడం ద్వారా వలసదారులు, విదేశీయుల చట్టంలోని నిబంధనలను ఉల్లంఘించారనే ఆరోపణల నేపథ్యంలో ఎఫ్‌ఆర్‌ఆర్‌వో ఈ చర్య తీసుకున్నట్లు తెలుస్తోంది. ఈ నెల 10న ముంబైలోని ఆగస్ట్‌ క్రాంతి మైదానంలో జరిగిన సీఈసీ వ్యతిరేక నిరసనల్లో పాల్గొన్న ఇమ్రాన్‌ ఖాన్‌ను పోలీసులు అదుపులోకి తీసుకుని, అనంతరం విడుదల చేశారు.