ఫ్రాన్స్‌లో నిరసనల సెగ.. భారతీయులకు ఎంబసీ కీలక హెచ్చరిక

మౌలిక వసతుల సమస్యలు, పెరుగుతున్న ధరలు సహా పలు అంశాలపై ఫ్రాన్స్‌లో నిరసనలు కొనసాగుతున్న నేపథ్యంలో పారిస్‌లోని భారత రాయబార కార్యాలయం భారతీయులకు కీలక సూచనలు జారీ చేసింది. ఫ్రాన్స్‌లో నివసిస్తున్నవారు, ఆ దేశానికి వెళ్లాలనుకునే ప్రయాణికులు అప్రమత్తంగా ఉండాలని హెచ్చరించింది. నిరసనలు జరుగుతున్న ప్రాంతాలు, ప్రజలు భారీగా గుమిగూడే ప్రదేశాలకు దూరంగా ఉండాలని సూచించింది. స్థానిక ప్రభుత్వాలు జారీ చేసే అధికారిక హెచ్చరికలను ఎప్పటికప్పుడు గమనించాలని, ప్రయాణానికి ముందు రవాణా సేవలకు సంబంధించిన తాజా వివరాలను పరిశీలించుకోవాలని తెలిపింది. ఇందుకు సంబంధించిన సమాచారంతో పాటు ఉపయోగకరమైన వెబ్‌సైట్ల వివరాలను కూడా ఎంబసీ పంచుకుంది.

మరోవైపు, ఫ్రాన్స్‌లో జరుగుతున్న నిరసనలపై అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలను ఫ్రాన్స్ అధ్యక్షుడు ఇమ్మాన్యుయేల్ మేక్రాన్ తీవ్రంగా ఖండించారు. రాజకీయ ప్రయోజనాల కోసం విదేశీ నాయకులు ఇలాంటి వ్యాఖ్యలు చేస్తున్నారని విమర్శించారు. ఫ్రాన్స్‌లో హింసాత్మక ఘటనలకు అక్కడి ప్రభుత్వ వలస విధానాలే కారణమని ట్రంప్ వ్యాఖ్యానించిన నేపథ్యంలో మేక్రాన్ స్పందించారు. ట్రంప్ వ్యాఖ్యలు నిరాధారమైనవని, వాటిని సమర్థించలేమని ఆయన ఆగ్రహం వ్యక్తం చేశారు.