ఫుడ్ డెలివరీ రంగంలోకి ఫ్లిప్‌కార్ట్.. స్విగ్గీ, జొమాటోకు గట్టి పోటీ!

భారత్‌లో ప్రముఖ ఈ-కామర్స్ సంస్థగా ఉన్న ఫ్లిప్‌కార్ట్ ఇప్పుడు ఆన్‌లైన్ ఫుడ్ డెలివరీ రంగంలోకి ప్రవేశించేందుకు సిద్ధమవుతున్నట్లు నివేదికలు వెల్లడిస్తున్నాయి. ‘ఈట్-ఇన్ బై మినిట్స్’ పేరుతో ఈ సేవను ప్రారంభించాలని సంస్థ యోచిస్తున్నట్లు సమాచారం. ఇప్పటికే ఈ రంగంలో సేవలందిస్తున్న స్విగ్గీ, జొమాటోకు పోటీ ఇవ్వడం ఈ ప్రయత్నం ప్రధాన లక్ష్యంగా కనిపిస్తోంది. అందించిన నివేదిక ప్రకారం, బెంగళూరులోని ఫ్లిప్‌కార్ట్ ప్రధాన కార్యాలయంలో సుమారు 8,000 మంది ఉద్యోగులతో ప్రయోగాత్మక పరీక్షలు నిర్వహిస్తున్నారు. ఆర్డర్ చేసే విధానం, చెల్లింపుల వ్యవస్థ, డెలివరీ వేగం వంటి అంశాలను పరిశీలించిన అనంతరం ఐదు లేదా ఆరు ప్రధాన నగరాలకు సేవలను విస్తరించాలని భావిస్తున్నట్లు తెలుస్తోంది. అయితే, ప్రారంభ తేదీపై అధికారిక ప్రకటన వెలువడలేదు.

వినియోగదారులు ప్రత్యేక యాప్‌ను డౌన్‌లోడ్ చేసుకోవాల్సిన అవసరం లేకుండా ఫ్లిప్‌కార్ట్ ప్రధాన యాప్‌లోనే ఫుడ్ ఆర్డరింగ్ సదుపాయాన్ని అందుబాటులోకి తీసుకురావాలని సంస్థ యోచిస్తున్నట్లు సమాచారం. రెస్టారెంట్లు, ప్రముఖ ఆహార బ్రాండ్లను అనుసంధానించేందుకు ఓపెన్ నెట్‌వర్క్ ఫర్ డిజిటల్ కామర్స్ (ONDC)తో భాగస్వామ్యాన్ని కూడా పరిశీలిస్తున్నట్లు నివేదిక పేర్కొంది. ఆహారాన్ని వినియోగదారులకు చేరవేసేందుకు ఫ్లిప్‌కార్ట్ తన ఈకార్ట్ లాజిస్టిక్స్ విభాగాన్ని వినియోగించే అవకాశం ఉంది. కొత్త కస్టమర్లను ఆకర్షించేందుకు ఆఫర్లు, క్యాష్‌బ్యాక్‌లు, పోటీ ధరలను ప్రవేశపెట్టవచ్చని అంచనా. అయితే, సేవలు ప్రారంభమయ్యే నగరాలు, డెలివరీ ఛార్జీలు, రెస్టారెంట్ భాగస్వామ్యాలు, ప్రారంభ తేదీ వంటి వివరాలపై అధికారిక స్పష్టత రావాల్సి ఉంది.