కోట్లు సంపాదించే కెరీర్ కంటే కుటుంబమే ముఖ్యం.. మైక్రోసాఫ్ట్ మాజీ ఎగ్జిక్యూటివ్ నిర్ణయం

మైక్రోసాఫ్ట్‌లో 23 ఏళ్లపాటు పనిచేసి, ఇంజినీరింగ్ విభాగంలో వైస్ ప్రెసిడెంట్ స్థాయికి ఎదిగిన భారత సంతతికి చెందిన టెక్నాలజీ నిపుణుడు కేశవన్ షణ్ముగం తన ఉద్యోగ జీవితానికి వీడ్కోలు పలకాలని నిర్ణయించుకున్నారు. ఎక్సెల్ కోపైలట్, ఏజెంటిక్ ఏఐ వ్యవస్థలకు సంబంధించిన ఇంజినీరింగ్ పనుల్లో ఆయన కీలక పాత్ర పోషించారు. 2026 అక్టోబర్‌లో తన నిర్ణయాన్ని వెల్లడించిన ఆయన, భారత్‌లో ఉంటున్న వృద్ధ తల్లిదండ్రులతో మరింత సమయం గడపాలనే ఉద్దేశంతో పదవీ విరమణ చేస్తున్నట్లు తెలిపారు.

లింక్డ్‌ఇన్‌లో తన వీడ్కోలు సందేశాన్ని పంచుకున్న కేశవన్, ఆసక్తికరమైన ప్రాజెక్టులు, ప్రతిభావంతులైన సహచరులను విడిచిపెట్టడం అంత సులభం కాదని పేర్కొన్నారు. అయితే, కుటుంబ సభ్యులు, స్నేహితులతో సమయం గడపడమే ప్రస్తుతం తనకు సరైన నిర్ణయమని వివరించారు. తన 23 ఏళ్ల ప్రయాణాన్ని మరపురానిదిగా మార్చిన మైక్రోసాఫ్ట్ సంస్థకు, సహచరులకు కృతజ్ఞతలు తెలిపారు. కెరీర్‌లో ఎదుగుదలతో పాటు కుటుంబానికి సమయం కేటాయించడం కూడా ముఖ్యమనే సందేశంతో ఆయన నిర్ణయం పలువురిని ఆకట్టుకుంటోంది.