ఉప ముఖ్యమంత్రి కార్యాలయం పేరుతో నకిలీ వాట్సాప్ ఛానల్.. అధికారుల హెచ్చరిక

ఆంధ్రప్రదేశ్ ఉప ముఖ్యమంత్రి కార్యాలయం పేరుతో నిర్వహిస్తున్న నకిలీ వాట్సాప్‌ ఛానల్‌పై కార్యాలయ అధికారులు హెచ్చరిక జారీ చేశారు. “డిప్యూటీ సీఎం, ఆంధ్రప్రదేశ్‌” పేరుతో కొనసాగుతున్న ఈ ఛానల్‌కు ఉప ముఖ్యమంత్రి కార్యాలయంతో ఎలాంటి అధికారిక సంబంధం లేదని స్పష్టం చేశారు. కార్యాలయం పేరు, గుర్తింపును దుర్వినియోగం చేస్తూ ప్రజలను తప్పుదోవ పట్టించే సమాచారాన్ని, సంబంధం లేని ఇతర అంశాలను ప్రచారం చేస్తున్నట్లు పేర్కొన్నారు. అధికారిక కార్యాలయంగా తప్పుడు గుర్తింపుతో వ్యవహరించడం, తప్పుడు సమాచారాన్ని వ్యాప్తి చేయడాన్ని తీవ్రంగా పరిగణిస్తున్నట్లు వెల్లడించారు.

ఈ వ్యవహారంపై ఇప్పటికే ప్రథమ సమాచార నివేదిక (ఎఫ్‌ఐఆర్‌) నమోదుకు తగిన చర్యలు చేపట్టినట్లు ఉప ముఖ్యమంత్రి కార్యాలయం తెలిపింది. నకిలీ ఛానల్‌ను ప్రజలు అనుసరించవద్దని, అందులోని సమాచారాన్ని ఇతరులకు పంపించవద్దని సూచించింది. ప్రామాణిక సమాచారం, అధికారిక తాజా వివరాల కోసం కార్యాలయానికి చెందిన గుర్తింపు పొందిన సామాజిక మాధ్యమ ఖాతాలు, ధృవీకరించిన వాట్సాప్‌ ఛానల్‌ను మాత్రమే అనుసరించాలని విజ్ఞప్తి చేసింది. ప్రభుత్వ కార్యాలయ గుర్తింపును దుర్వినియోగం చేసే వారిపై చట్టపరమైన చర్యలు తీసుకుంటామని హెచ్చరించింది.