చీరాలలో స్థానిక సంస్థల ఎన్నికల ఏర్పాట్లను పరిశీలించిన ఎన్నికల పర్యవేక్షణ అధికారి పద్మావతి

బాపట్ల జిల్లాకు స్థానిక సంస్థల ఎన్నికల పర్యవేక్షణ అధికారిగా నియమితులైన ఎ.ఎ.ఎల్. పద్మావతి చీరాల మున్సిపల్ కార్యాలయాన్ని సందర్శించి నామినేషన్ల ప్రక్రియ, ఎన్నికల ఏర్పాట్లను పరిశీలించారు. ఈ సందర్భంగా రెవెన్యూ డివిజన్ అధికారి నరసింహారావు, మున్సిపల్ కమిషనర్ డానియల్ ఆమెకు పుష్పగుచ్ఛంతో స్వాగతం పలికారు. అనంతరం నామినేషన్ల స్వీకరణకు చేసిన ఏర్పాట్లు, ప్రక్రియ నిర్వహణ, సంబంధిత అధికారులు నిర్వహిస్తున్న విధులపై పద్మావతి ఆరా తీశారు. ఎన్నికల నిబంధనలను కచ్చితంగా పాటిస్తూ నామినేషన్ల స్వీకరణను పారదర్శకంగా, ప్రశాంత వాతావరణంలో నిర్వహించాలని సూచించారు. ఎన్నికల ప్రక్రియలో ఎలాంటి ఇబ్బందులు తలెత్తకుండా ముందస్తు ఏర్పాట్లు పూర్తి చేయాలని, అధికారులు తమ విధులను సమర్థవంతంగా నిర్వహించాలని ఆదేశించారు.

అనంతరం పోలింగ్ కేంద్రాలు, స్ట్రాంగ్ రూమ్‌లు, ఎన్నికల సామగ్రి పంపిణీ కేంద్రాలు, ఓట్ల లెక్కింపు కేంద్రాలను ఆమె పరిశీలించారు. పోలింగ్ కేంద్రాల్లో తగిన విద్యుత్ దీపాలు, మంచినీటి సదుపాయం, బారికేడ్లు ఏర్పాటు చేయాలని అధికారులకు సూచించారు. పోలింగ్ కేంద్రాలకు సంబంధించిన రూట్ మ్యాప్‌లను సిద్ధం చేసి అందజేయాలని ఆదేశించారు. ఎన్నికల భద్రతా ఏర్పాట్లపై చీరాల డీఎస్పీ ఎం.డి. మోయున్‌తో ప్రత్యేకంగా సమావేశమయ్యారు. ఎలాంటి అవాంఛనీయ సంఘటనలు జరగకుండా పటిష్ఠ భద్రతా చర్యలు చేపట్టి ఎన్నికల ప్రక్రియను ప్రశాంతంగా పూర్తి చేయాలని సూచించారు. ఈ కార్యక్రమంలో రెవెన్యూ డివిజన్ అధికారి నరసింహారావు, మున్సిపల్ కమిషనర్ డానియల్, డీఎస్పీ ఎం.డి. మోయున్, తహసీల్దార్ గోపికృష్ణ తదితరులు పాల్గొన్నారు.