తెలుగు రాష్ట్రాల్లో ఈడీ మెరుపు దాడులు

తెలుగు రాష్ట్రాల్లో ఎన్‌ఫోర్స్‌మెంట్ డైరెక్టరేట్ (ఈడీ) అధికారులు మరోసారి సోదాలు నిర్వహిస్తున్నారు. హైదరాబాద్‌, విజయవాడ సహా ఆంధ్రప్రదేశ్‌, తెలంగాణలోని మొత్తం 15 ప్రాంతాల్లో ఏకకాలంలో తనిఖీలు చేపట్టినట్లు సమాచారం. మహారాష్ట్రలోని పుణె సైబర్ క్రైమ్ పోలీస్ స్టేషన్‌లో నమోదైన ఎఫ్‌ఐఆర్‌ ఆధారంగా మనీలాండరింగ్ నిరోధక చట్టం (పీఎంఎల్‌ఏ) కింద కేసు నమోదు చేసి ఈ సోదాలు చేపట్టినట్లు తెలుస్తోంది. ఆన్‌లైన్ బెట్టింగ్ యాప్‌లు, మోసపూరిత పెట్టుబడి యాప్‌ల ద్వారా ప్రజలను ఆకర్షించి భారీ మొత్తంలో డబ్బు వసూలు చేసిన అంతర్రాష్ట్ర ముఠాల కార్యకలాపాలపై దర్యాప్తు సంస్థ దృష్టి సారించింది.

గతవారం ఢిల్లీ, ముంబై, గురుగ్రామ్‌ ప్రాంతాల్లో నిర్వహించిన సోదాల్లో లభించిన సమాచారంతో తెలుగు రాష్ట్రాల్లోని ఏజెంట్లు, హవాలా నెట్‌వర్క్‌లపై అధికారులు దృష్టి పెట్టినట్లు సమాచారం. బెట్టింగ్ ద్వారా సేకరించిన డబ్బును షెల్ కంపెనీలు, క్రిప్టోకరెన్సీల మార్గంలో విదేశాలకు తరలించినట్లు అనుమానిస్తున్నారు. ఈ క్రమంలో అనుమానితుల నివాసాలు, కార్యాలయాల్లో ఆర్థిక లావాదేవీల పత్రాలు, రికార్డులు, డిజిటల్ పరికరాలను పరిశీలిస్తున్నారు. సోదాల్లో నగదు, బ్యాంకు ఖాతాలు, హవాలా లావాదేవీలకు సంబంధించిన ఆధారాలు లభించినట్లు వార్తలు వెలువడుతున్నప్పటికీ, వాటి వివరాలను అధికారికంగా ధ్రువీకరించాల్సి ఉంది.