దేశంలో మళ్లీ ఎన్నికల సందడి.. ఆరు స్థానాలకు ఉప ఎన్నికల షెడ్యూల్

దేశంలో మరోసారి ఎన్నికల సందడి మొదలైంది. అస్సాంలోని ఒక లోక్‌సభ స్థానం, పశ్చిమ బెంగాల్, తమిళనాడు, పుదుచ్చేరిలోని ఐదు అసెంబ్లీ నియోజకవర్గాలకు కేంద్ర ఎన్నికల సంఘం సోమవారం (సెప్టెంబర్ 7) ఉప ఎన్నికల షెడ్యూల్ విడుదల చేసింది. ఈ ఆరు స్థానాలకు అక్టోబర్ 6న పోలింగ్ నిర్వహించనుండగా, అక్టోబర్ 9న ఓట్ల లెక్కింపు చేపట్టి ఫలితాలను ప్రకటించనున్నారు. వివిధ కారణాలతో స్థానాలు ఖాళీ కావడంతో ఈ ఉప ఎన్నికలు అనివార్యమయ్యాయి. అస్సాంలోని నగావ్ లోక్‌సభ స్థానం, పశ్చిమ బెంగాల్‌లోని నందిగ్రామ్, రేజీగ్రామ్, పుదుచ్చేరిలోని తట్టంచావడి, తమిళనాడులోని మదురాంతకం, ధరాపురం అసెంబ్లీ స్థానాలకు ఎన్నికలు జరగనున్నాయి.

అయితే తమిళనాడులోని మరికొన్ని నియోజకవర్గాలకు ఈ దఫా ఉప ఎన్నికలు ప్రకటించలేదు. సీఎం విజయ్ రాజీనామా చేసినట్లు పేర్కొన్న తిరుచ్చి ఈస్ట్‌తో పాటు విరాలిమలై, పెరందురై, అంబాసముద్రం, కరూర్ తదితర స్థానాల్లో గత ఎన్నికల ఫలితాలను సవాల్ చేస్తూ మద్రాస్ హైకోర్టులో పిటిషన్లు దాఖలయ్యాయి. ఈ పిటిషన్లపై విచారణ కొనసాగుతున్న నేపథ్యంలో, కేసులు పరిష్కారమై తీర్పులు వెలువడే వరకు ఆయా స్థానాల్లో ఉప ఎన్నికలు నిర్వహించబోమని గతంలో ఈసీ కోర్టుకు తెలిపింది. దీంతో తాజాగా ప్రకటించిన షెడ్యూల్‌లో ఆ స్థానాలకు చోటు దక్కలేదు.