జామ్‌నగర్ వేడుకల్లో ధోనీ సందడి వీడియోలు వైరల్

టీమిండియా మాజీ కెప్టెన్ ఎంఎస్ ధోనీ ఏం చేసినా సోషల్ మీడియాలో వైరల్ అవుతుంటుంది. తాజాగా గుజరాత్‌లోని జామ్‌నగర్‌లో రిలయన్స్ గ్రీన్స్‌లో అంబానీ కుటుంబం నిర్వహించిన నవరాత్రి వేడుకల్లో ధోనీ తన భార్య సాక్షితో కలిసి సందడి చేశాడు. అనంత్ అంబానీ, రాధిక మర్చంట్‌లతో కలిసి డ్రాగన్ బోట్ రైడ్‌తో పాటు పలు వినోద కార్యక్రమాల్లో పాల్గొన్నాడు. ఈ వేడుకలకు సంబంధించిన వీడియోలు ప్రస్తుతం నెట్టింట చక్కర్లు కొడుతున్నాయి.

డ్రాగన్ బోట్ రైడ్‌లో అందరూ అరుపులు, కేకలతో సందడి చేస్తుంటే ధోనీ మాత్రం ఎలాంటి హావభావాలు ప్రదర్శించకుండా ప్రశాంతంగా ఎంజాయ్ చేశాడు. దీంతో నెటిజన్లు ఆయనను ‘కెప్టెన్ కూల్’ అంటూ ప్రశంసిస్తున్నారు. మరికొందరు ‘లాస్ట్ బెంచ్ విద్యార్థి అనుకుంటా’ అంటూ సరదాగా వ్యాఖ్యానిస్తున్నారు. అర్ధరాత్రి రెండు గంటల సమయంలో ధోనీ, సాక్షి ఈ వేడుకలకు హాజరైనట్లు సమాచారం. అనంత్ అంబానీ, రాధికతో కలిసి ఐస్‌క్రీమ్ తిన్న ధోనీ, ఆటలు ఆడుతూ అభిమానులతో ముచ్చటించాడు. సంప్రదాయ సంగీతం, గర్బా నృత్యాలు, పలు వినోద కార్యక్రమాలతో ఈ వేడుకలు సందడిగా సాగాయి.