ఢిల్లీలో నిరసనల వేళ సీజేపీ వ్యవస్థాపకుడి అరెస్ట్‌

దేశ రాజధాని ఢిల్లీలో నిరసనలు కొనసాగుతున్న నేపథ్యంలో పోలీసులు ముందస్తు చర్యలు చేపట్టారు. కాక్రోచ్ జనతా పార్టీ (సీజేపీ) వ్యవస్థాపకుడు అభిజీత్ దీప్కేను శుక్రవారం సాయంత్రం అరెస్ట్ చేశారు. శాంతిభద్రతలకు విఘాతం కలిగే అవకాశం ఉందన్న కారణంతో భారతీయ నాగరిక్ సురక్షా సంహిత (బీఎన్‌ఎస్‌ఎస్‌) సెక్షన్లు 126, 170 కింద చర్యలు తీసుకున్నట్లు సమాచారం. అనంతరం ఆయన్ను ప్రత్యేక కార్యనిర్వాహక మేజిస్ట్రేట్‌ ఎదుట హాజరుపరచనున్నట్లు తెలిసింది. ఢిల్లీలో నిర్వహించిన ‘లెహ్రా దో తిరంగా’ నిరసనల్లో పాల్గొనేందుకు వెళ్తున్న అఖిల భారత విద్యార్థి సంఘం (ఏఐఎస్ఏ) అధ్యక్షురాలు నేహా బోరాను కూడా పోలీసులు అరెస్ట్ చేశారు. అయితే, నిర్బంధానికి సంబంధించిన ప్రక్రియ పూర్తయ్యాక ఆమెను విడుదల చేశారు.

దీప్కే అరెస్ట్‌ విషయాన్ని సీజేపీ న్యాయ విభాగాధిపతి రత్నసింగ్‌ సామాజిక మాధ్యమం ‘ఎక్స్‌’లో వెల్లడించారు. ఆయన్ను ప్రత్యేక మేజిస్ట్రేట్‌ ఎదుట హాజరుపరచనున్నారని పేర్కొంటూ, ప్రస్తుతం ఆయన ఎక్కడున్నారో తనకు తెలియదని తెలిపారు. దీప్కేను రహస్య ప్రదేశానికి తరలించారని, ఆయనతో సంబంధాలు తెగిపోయాయని సీజేపీ ఆరోపించింది. మరోవైపు, నేహా బోరాను ఢిల్లీలోని మంగోల్‌పురి యాంటీ నార్కోటిక్స్ టాస్క్‌ఫోర్స్‌ కార్యాలయంలో ఒంటరిగా ఉంచారని, తమ నేతలను కలిసేందుకు న్యాయవాదులు, సహచరులకు అనుమతి ఇవ్వడం లేదని ఏఐఎస్ఏ ఆరోపించింది. అనంతరం బోరాను పోలీసులు విడుదల చేశారు.