దీపావళి వరకు కాక్రోచ్ జనతా పార్టీ ఆందోళనలకు బ్రేక్.. అభిజీత్ దీప్కే కీలక ప్రకటన

కాక్రోచ్ జనతా పార్టీ (CJP) దీపావళి వరకు దేశవ్యాప్తంగా ఎలాంటి ఆందోళనలు చేపట్టబోదని ఆ పార్టీ వ్యవస్థాపకుడు అభిజీత్ దీప్కే ప్రకటించారు. కుటుంబ సభ్యులతో కలిసి పండగలను ప్రశాంతంగా, ఆనందంగా జరుపుకోవాలని తమకు మద్దతుగా నిలుస్తున్న యువతకు సూచించారు. ప్రధాన ఎన్నికల కమిషనర్ (CEC) రాజీనామా చేయాలంటూ గత కొన్ని రోజులుగా యువత చేపడుతున్న ఉద్యమం వారి కుటుంబాల్లో ఆందోళనకు కారణమవుతోందని ఆయన పేర్కొన్నారు. ఈ పరిస్థితితో తన కుటుంబంతో పాటు, ప్రస్తుతం జ్యుడీషియల్ కస్టడీలో ఉన్న పార్టీ నేతలు సౌరవ్ దాస్, అశుతోష్ కుటుంబ సభ్యులు కూడా కలత చెందుతున్నారని తెలిపారు. ఈ నేపథ్యంలో దీపావళి వరకు నిరసన కార్యక్రమాలకు విరామం ఇవ్వాలని నిర్ణయించినట్లు వెల్లడించారు.

ఇదిలా ఉండగా, దసరా సందర్భంగా దేశ రాజధాని ఢిల్లీలోని రామ్‌లీలా మైదానంలో రావణుడు, కుంభకర్ణుడు, ఇంద్రజిత్తు దిష్టిబొమ్మలతో పాటు ఈసారి కాక్రోచ్ దిష్టిబొమ్మను కూడా దహనం చేయనున్నారు. స్వచ్ఛ భారత్, స్వచ్ఛ ఢిల్లీ కార్యక్రమాల్లో భాగంగా అపరిశుభ్రతకు చిహ్నంగా భావించే బొద్దింకకు 30 అడుగుల భారీ దిష్టిబొమ్మను రూపొందించినట్లు రామ్‌లీలా కమిటీ తెలిపింది. ఈ పరిణామంపై అభిజీత్ దీప్కే స్పందిస్తూ, తమ పార్టీకి ఉచితంగా ప్రచారం కల్పిస్తున్నందుకు కృతజ్ఞతలు తెలిపారు. కాక్రోచ్ దిష్టిబొమ్మ దహనం, కాక్రోచ్ జనతా పార్టీ పేరుతో ముడిపడిన రాజకీయ చర్చకు కొత్త కోణాన్ని జోడించింది.