24 గంటల్లో కోటి మంది ఫాలోవర్లు.. చైనా బ్యూటీ ఇన్‌ఫ్లుయెన్సర్ సంచలనం!

సోషల్ మీడియాలో భారీ స్థాయిలో ఫాలోవర్లను సంపాదించడం అంత సులభం కాదు. కానీ చైనాకు చెందిన బ్యూటీ మరియు మేకప్ ఇన్‌ఫ్లుయెన్సర్ జియాంగ్ చెంగ్లాన్ అసాధ్యాన్ని సుసాధ్యం చేస్తూ సంచలనం సృష్టించింది. మూడేళ్ల విరామం తర్వాత సోషల్ మీడియాలోకి తిరిగి వచ్చిన ఆమె, కేవలం 24 గంటల్లోనే కోటి మందికి పైగా ఫాలోవర్లను సంపాదించి రికార్డు నెలకొల్పింది. ఈ ఘనత ఫుట్‌బాల్ స్టార్ క్రిస్టియానో రొనాల్డో సోషల్ మీడియా రికార్డులను గుర్తు చేస్తోంది.

గతంలో “చెంగ్షియాన్” పేరుతో డౌయిన్‌లో దాదాపు 3 కోట్ల మంది ఫాలోవర్లు కలిగిన జియాంగ్ చెంగ్లాన్, 2023 మే నుంచి సోషల్ మీడియాకు దూరమయ్యారు. మాజీ ఏజెన్సీతో ఏర్పడిన వివాదాలు, ఆమె పాత పేరుపై ట్రేడ్‌మార్క్ సమస్యల కారణంగానే ఈ నిర్ణయం తీసుకున్నట్లు సమాచారం. మే 13న తన అసలు పేరుతో కొత్త అకౌంట్ ప్రారంభించిన ఆమెకు అభిమానుల నుంచి భారీ స్పందన లభించింది. తన పాత అకౌంట్‌తో ఎలాంటి సంబంధం లేదని, అక్కడి నుంచి ఉత్పత్తులు కొనొద్దని ఫాలోవర్లకు సూచించింది.