పుట్టిన గడ్డపై దసరా జరుపుకోవడం ఎంతో సంతోషంగా ఉంది - సీఎం రేవంత్

తెలంగాణ ముఖ్యమంత్రి రేవంత్ రెడ్డి తన స్వగ్రామమైన కొండారెడ్డిపల్లిలో జరిగిన దసరా వేడుకల గురించి ఎక్స్ వేదికగా ఓ పోస్ట్ చేశారు. సామాన్యుడి నుంచి రాష్ట్ర ముఖ్యమంత్రిగా ఎదిగే క్రమంలో కొండారెడ్డిపల్లి తనకు కొండంత స్ఫూర్తిని, శక్తిని అందించిన నేల అని ఆయన పేర్కొన్నారు. తాను జన్మించిన గడ్డపై దసరా పండుగను జరుపుకోవడం ఎంతో సంతోషంగా ఉందని వెల్లడించారు. తన స్వగ్రామంతో ఉన్న అనుబంధాన్ని ఈ సందర్భంగా గుర్తుచేసుకున్నారు.

రాష్ట్ర ప్రజలందరూ సుఖసంతోషాలతో, సుభిక్షంగా ఉండాలని ఆకాంక్షిస్తూ కొండారెడ్డిపల్లి ఆంజనేయస్వామిని ప్రార్థించినట్లు సీఎం రేవంత్ రెడ్డి తెలిపారు. ప్రజలందరికీ స్వామివారి ఆశీస్సులు అందాలని కోరుకున్నట్లు పేర్కొన్నారు. ఆయన చేసిన ఈ పోస్ట్ తన పుట్టిన గడ్డపై ఉన్న అభిమానాన్ని, తన జీవిత ప్రయాణంలో కొండారెడ్డిపల్లి పోషించిన కీలక పాత్రను ప్రతిబింబిస్తోంది.