ఆస్ట్రియన్ ఎయిర్‌లైన్స్ విమానానికి బాంబు బెదిరింపు

ఇజ్రాయెల్‌లోని టెల్‌అవీవ్‌ నుంచి ఆస్ట్రియా రాజధాని వియన్నాకు వెళ్తున్న ఆస్ట్రియన్ ఎయిర్‌లైన్స్‌కు చెందిన ఎయిర్‌బస్‌ ఏ320 విమానానికి బాంబు బెదిరింపు రావడంతో అత్యవసరంగా దారి మళ్లించారు. బల్గేరియా రాజధాని సోఫియాలో విమానం సురక్షితంగా ల్యాండ్‌ అయింది. రొమేనియా సరిహద్దు సమీపంలో ప్రయాణిస్తున్న సమయంలో విమాన సిబ్బందికి బెదిరింపు సమాచారం అందడంతో అప్రమత్తమైన అధికారులు విమానాన్ని సోఫియాకు మళ్లించారు. విమానం అక్కడికి చేరుకునే వరకు బల్గేరియా వైమానిక దళానికి చెందిన యుద్ధవిమానం ఎస్కార్ట్‌గా వ్యవహరించింది. విమానం దిగిన వెంటనే అందులో ఉన్న 51 మంది ప్రయాణికులు, ఆరుగురు సిబ్బందిని సురక్షితంగా బయటకు తీసుకొచ్చారు.

గుర్తుతెలియని వ్యక్తి నుంచి వచ్చిన బెదిరింపు కారణంగా ఈ ఘటన చోటుచేసుకున్నట్లు ఇజ్రాయెల్‌ మీడియా నివేదించింది. విమానంలో అనుమానాస్పద వస్తువు కనిపించడంతో భద్రతాపరమైన ఆందోళనలు తలెత్తినట్లు పేర్కొంది. ఐక్యరాజ్యసమితిలో ప్రసంగించేందుకు ప్రయాణిస్తున్న ఇజ్రాయెల్‌ యువ ప్రతినిధుల బృందం కూడా విమానంలో ఉన్నట్లు సమాచారం. విమానం ల్యాండ్‌ అయిన తర్వాత భద్రతా సిబ్బంది తనిఖీలు చేపట్టారు. అయితే, బాంబు బెదిరింపునకు సంబంధించిన పూర్తి వివరాలు, తనిఖీల ఫలితాలను విమానయాన సంస్థ అధికారికంగా వెల్లడించాల్సి ఉంది.