భోగాపురం అంతర్జాతీయ విమానాశ్రయానికి కేంద్రం కీలక గుర్తింపు..

భోగాపురం అంతర్జాతీయ విమానాశ్రయానికి కేంద్ర హోంశాఖ కీలక గుర్తింపు లభించింది. ‘ఇమిగ్రేషన్, విదేశీయుల చట్టం-2025’ పరిధిలోకి ఈ విమానాశ్రయాన్ని అధికారికంగా చేర్చుతూ కేంద్ర ప్రభుత్వం గెజిట్ నోటిఫికేషన్ జారీ చేసింది. దీంతో భోగాపురం విమానాశ్రయానికి ఇమిగ్రేషన్ చెక్‌పోస్ట్ (ICP) హోదా లభించింది. ఇది అంతర్జాతీయ ప్రయాణికుల రాకపోకలకు అత్యంత కీలకమైన ముందడుగుగా భావిస్తున్నారు.

ఈ నిర్ణయంతో భోగాపురం దేశంలోని కేటగిరీ-1 విమానాశ్రయాల జాబితాలో 39వ స్థానాన్ని దక్కించుకుంది. అంతర్జాతీయ విమానాల రాకపోకలు ప్రారంభించేందుకు అవసరమైన ప్రక్రియలకు ఇది కీలక ఊతమివ్వనుంది. కేంద్ర హోంశాఖ అదనపు కార్యదర్శి నితేశ్ కుమార్ వ్యాస్ పేరుతో ఈ మేరకు అధికారిక ఉత్తర్వులు జారీ అయ్యాయి.