బాలకృష్ణ, చిరంజీవి చొరవతో డాన్సర్స్ అసోసియేషన్ వివాదానికి ముగింపు

డాన్సర్స్ అసోసియేషన్‌లో గత కొన్ని రోజులుగా కొనసాగుతున్న వివాదానికి సినీ పరిశ్రమ పెద్దలు నందమూరి బాలకృష్ణ, చిరంజీవి చొరవతో ముగింపు లభించింది. ఫెడరేషన్ అత్యవసర సమావేశంలో ఫెడరేషన్ అధ్యక్షుడు అనిల్ వల్లభనేని, డైరెక్టర్స్ అసోసియేషన్ ప్రతినిధి సాయి రాజేష్, ప్రొడ్యూసర్స్ కౌన్సిల్ ప్రతినిధులు చదలవాడ శ్రీనివాసరావు, తుమ్మల ప్రసన్నకుమార్, కొరియోగ్రాఫర్ జానీ మాస్టర్, డాన్సర్స్ అసోసియేషన్ అధ్యక్షురాలు సుమలత పాల్గొని సుదీర్ఘంగా చర్చించారు. అనంతరం జానీ మాస్టర్‌పై విధించిన శాశ్వత బహిష్కరణను వెనక్కి తీసుకుంటున్నట్లు ఫెడరేషన్ ప్రకటించింది. జానీ మాస్టర్, సుమలత ఇచ్చిన వివరణతో ఫెడరేషన్ సంతృప్తి చెందినట్లు వెల్లడించింది.

మీడియా సమావేశంలో మాట్లాడిన ఫెడరేషన్ ప్రతినిధులు, జూలై 26న జరిగే డాన్సర్స్ అసోసియేషన్ జనరల్ బాడీ సమావేశంలో రాజీనామా చేసిన సభ్యులంతా తిరిగి ఐక్యంగా పనిచేస్తారని తెలిపారు. జానీ మాస్టర్, సుమలత ఈ సమస్య పరిష్కారానికి సహకరించిన ఫెడరేషన్‌కు, పరిశ్రమ పెద్దలకు కృతజ్ఞతలు తెలిపారు. నిర్మాతల మండలి కార్యదర్శి తుమ్మల ప్రసన్నకుమార్, చదలవాడ శ్రీనివాసరావు మాట్లాడుతూ కార్మికుల సంక్షేమం, పరిశ్రమ ఐక్యతే తమ ప్రధాన లక్ష్యమని చెప్పారు. ఈ సమస్య పరిష్కారంలో బాలకృష్ణ, చిరంజీవి కీలక పాత్ర పోషించారని వారు ప్రత్యేకంగా అభినందించారు.