సాంకేతికతలో ఏపీ పోలీసులు అగ్రగామిగా నిలవాలి - చంద్రబాబు

అమరావతిలోని మంగళగిరి ఏపీఎస్పీ ఆరో బెటాలియన్‌లో నిర్వహించిన పోలీసు అమరవీరుల సంస్మరణ దినోత్సవ కార్యక్రమంలో ముఖ్యమంత్రి చంద్రబాబు నాయుడు పాల్గొన్నారు. విధి నిర్వహణలో ప్రాణాలు అర్పించిన పోలీసు సిబ్బందికి ఆయన, హోంమంత్రి వంగలపూడి అనిత, డీజీపీ హరీష్ కుమార్ గుప్తా, ఇతర అధికారులు నివాళులర్పించారు. ఈ సందర్భంగా ముఖ్యమంత్రి, హోంమంత్రి, డీజీపీ తదితరులు షహీద్ పుస్తక్ టోలీ, అమరులు వీరు పుస్తకాలను ఆవిష్కరించారు.

దేశ రక్షణ, ప్రజల భద్రత కోసం ప్రాణత్యాగం చేసిన పోలీసు అమరవీరులను స్మరించుకోవడం మన బాధ్యత అని చంద్రబాబు పేర్కొన్నారు. 1959 అక్టోబర్ 21న లడఖ్‌లో చైనా సైనికుల దాడిని తిప్పికొడుతూ పది మంది పోలీసులు వీరమరణం పొందారని గుర్తుచేశారు. వారి త్యాగానికి గుర్తుగా ఏటా ఈ రోజును పోలీసు అమరవీరుల సంస్మరణ దినంగా నిర్వహిస్తున్నట్లు తెలిపారు. ఫ్యాక్షన్ హింసను నియంత్రించడం, తీవ్రవాదాన్ని ఎదుర్కోవడం, మత ఘర్షణలను అరికట్టడంలో ఏపీ పోలీసులు విశేష ధైర్యసాహసాలు ప్రదర్శించారని ప్రశంసించారు. శాంతిభద్రతలు, అభివృద్ధి, ఉపాధి అవకాశాలు పరస్పరం ముడిపడి ఉన్నాయని, భద్రతపై నమ్మకం ఉన్నప్పుడే పెట్టుబడులు వస్తాయని అన్నారు.

పోలీసులు విధి నిర్వహణలో ధైర్యంతో పాటు మానవత్వాన్ని కూడా ప్రదర్శించాలని ముఖ్యమంత్రి సూచించారు. పోలీస్ స్టేషన్‌కు వచ్చే ప్రతి ఒక్కరితో గౌరవంగా వ్యవహరించాలని, రాజకీయ ముసుగులో నేరాలకు పాల్పడేవారితో పాటు సైబర్ నేరగాళ్లపై కఠిన చర్యలు తీసుకోవాలని ఆదేశించారు. నేరాలను అరికట్టడంలో సీసీ కెమెరాలు, డేటా విశ్లేషణ, డ్రోన్లు, కృత్రిమ మేధ కీలక పాత్ర పోషిస్తాయని పేర్కొన్నారు. సాంకేతిక పరిజ్ఞానం వినియోగంలో ఆంధ్రప్రదేశ్ పోలీసు శాఖ దేశంలోనే అగ్రస్థానంలో నిలవాలని ఆకాంక్షించారు.