భారతీయులకు మరో ఎదురుదెబ్బ.. ఈబీ-1 గ్రీన్‌కార్డులపై బ్రేక్‌

అమెరికాలో శాశ్వత నివాసం కోసం ఈబీ-1 కేటగిరీ ద్వారా గ్రీన్‌కార్డు పొందాలని ప్రయత్నిస్తున్న భారతీయులకు మరో ఎదురుదెబ్బ తగిలింది. భారీ డిమాండ్‌ కారణంగా కొత్త దరఖాస్తులకు అవకాశాలు మూసివేస్తున్నట్లు తాజా వీసా బులెటిన్‌లో వెల్లడైంది. ఉపాధి ఆధారిత గ్రీన్‌కార్డుల కోసం భారతీయులు ఇప్పటికే సుదీర్ఘ నిరీక్షణను ఎదుర్కొంటున్న నేపథ్యంలో తాజా పరిణామం ప్రాధాన్యం సంతరించుకుంది.

ఈబీ-1 కేటగిరీ ప్రధానంగా అసాధారణ ప్రతిభ కలిగిన వ్యక్తులు, అత్యుత్తమ ప్రొఫెసర్లు, పరిశోధకులు, కొన్ని బహుళజాతి సంస్థల ఎగ్జిక్యూటివ్‌లు, మేనేజర్లకు వర్తిస్తుంది. ప్రతిభ, అర్హతలు, వృత్తిపరమైన విజయాల ఆధారంగా శాశ్వత నివాసం పొందేందుకు ఇది కీలక మార్గంగా ఉంది. అయితే అందుబాటులో ఉన్న వార్షిక పరిమితితో పోలిస్తే డిమాండ్‌ అధికంగా ఉండటంతో భారతీయ నిపుణులకు గ్రీన్‌కార్డు ప్రక్రియ మరింత క్లిష్టంగా మారే అవకాశం ఉంది.