కీసర తహసీల్దార్ కార్యాలయంలో ఏసీబీ దాడులు

మేడ్చల్‌ జిల్లా కీసర తహసీల్దార్‌ కార్యాలయంలో అవినీతి నిరోధక శాఖ (ఏసీబీ) అధికారులు దాడులు నిర్వహించారు. ఈ సందర్భంగా రూ.2.5 లక్షల లంచం తీసుకుంటూ రెవెన్యూ శాఖకు చెందిన ముగ్గురు అధికారులు పట్టుబడ్డారు. 22A జాబితాలో ఉన్న భూమికి సక్సెషన్‌ ప్రక్రియ పూర్తి చేసేందుకు అధికారులు రూ.5 లక్షలు డిమాండ్‌ చేసినట్లు సమాచారం. ఇందులో భాగంగా అడ్వాన్స్‌గా రూ.2.5 లక్షలు తీసుకుంటుండగా ఏసీబీ అధికారులు వారిని రెడ్‌హ్యాండెడ్‌గా పట్టుకున్నట్లు తెలిసింది.

ఈ కేసులో డిప్యూటీ తహసీల్దార్‌ సందీప్‌రెడ్డి, సీనియర్‌ అసిస్టెంట్‌ విజయ్‌కుమార్‌రెడ్డి, రికార్డు అసిస్టెంట్‌ బాలకృష్ణను ఏసీబీ అధికారులు అరెస్ట్‌ చేశారు. భూమి వారసత్వ బదిలీ ప్రక్రియకు సంబంధించి లంచం డిమాండ్‌ చేసినట్లు వచ్చిన ఆరోపణలపై అధికారులు చర్యలు చేపట్టారు. ఈ ఘటనతో కీసర తహసీల్దార్‌ కార్యాలయంలో కలకలం రేగింది. కేసుకు సంబంధించిన తదుపరి వివరాలు అధికారికంగా వెల్లడికావాల్సి ఉంది.