ఏడాది గడిచినా....ఆ గాయం మానలేదు

2025 జూన్ 12న అహ్మదాబాద్‌లోని సర్దార్ వల్లభభాయ్ పటేల్ అంతర్జాతీయ విమానాశ్రయం నుంచి లండన్‌కు బయలుదేరిన ఎయిర్ ఇండియా ఏఐ 171 విమానం టేకాఫ్ అయిన కొద్దిసేపటికే బీజే వైద్య కళాశాల వసతి గృహ భవనంపై కుప్పకూలింది. ఈ ఘోర ప్రమాదంలో విమానంలోని 242 మందిలో 241 మంది ప్రాణాలు కోల్పోగా, నేలపై ఉన్న 19 మంది కూడా మృతి చెందారు. దీంతో మొత్తం మృతుల సంఖ్య 260కు చేరింది.

ఈ విషాద ఘటనకు దాదాపు ఏడాది పూర్తవుతున్నప్పటికీ బాధిత కుటుంబాలు ఇంకా ఆ మానసిక వేదన నుంచి బయటపడలేకపోతున్నాయి. కొందరు విమాన ప్రయాణం చేయాలంటే తీవ్ర భయాందోళనలకు గురవుతుండగా, మరికొందరు మానసిక ఒత్తిడి, ఆందోళనలను అధిగమించేందుకు నిపుణుల సలహాలు తీసుకుంటున్నారు. ప్రత్యక్ష సాక్షులు, కుటుంబ సభ్యులు ఇప్పటికీ ఆ భయానక దృశ్యాల జ్ఞాపకాలతో పోరాడుతూ సాధారణ జీవితంలోకి తిరిగి రావడానికి ప్రయత్నిస్తున్నారు.