గురుగ్రామ్‌లో జొమాటో సీఈఓ లగ్జరీ ఫ్లాట్‌కు భారీ డిమాండ్

జొమాటో సహ వ్యవస్థాపకుడు, సీఈఓ దీపిందర్ గోయల్ గురుగ్రామ్‌లోని అత్యంత విలాసవంతమైన నివాస సముదాయాల్లో ఒకటైన డీఎల్‌ఎఫ్‌ ది కామెలియాస్‌లో అపార్ట్‌మెంట్‌ను కొనుగోలు చేశారు. డీఎల్‌ఎఫ్‌ ఫేజ్‌-5, గోల్ఫ్‌ కోర్స్‌ రోడ్‌లో ఉన్న ఈ అపార్ట్‌మెంట్‌ విస్తీర్ణం 10,813 చదరపు అడుగులు. 2022 ఆగస్టులో డెవలపర్‌ నుంచి నేరుగా రూ.52.3 కోట్లకు కొనుగోలు చేసినట్లు సమాచారం.

ఆస్తి రిజిస్ట్రేషన్‌ రికార్డుల ప్రకారం, ఈ అపార్ట్‌మెంట్‌కు సంబంధించిన కన్వేయన్స్‌ డీడ్‌ 2025 మార్చిలో అధికారికంగా అమలైంది. ఇందుకోసం రూ.3.66 కోట్ల స్టాంప్‌ డ్యూటీ చెల్లించారు. గురుగ్రామ్‌లోని ప్రీమియం నివాస ఆస్తుల ధరలు పెరగడంతో, ఈ సముదాయంలో ఇదే తరహా విస్తీర్ణం ఉన్న అపార్ట్‌మెంట్‌ల ప్రస్తుత మార్కెట్‌ విలువ సుమారు రూ.140 కోట్లుగా అంచనా వేస్తున్నారు. ఈ అంచనా ప్రకారం, కొనుగోలు ధరతో పోలిస్తే ఆస్తి విలువ గణనీయంగా పెరిగింది.