విప్రో లాభాల్లో స్వల్ప తగ్గుదల

ఐటీ సేవల సంస్థ విప్రో ప్రస్తుత ఆర్థిక సంవత్సరం సెప్టెంబరుతో ముగిసిన రెండో త్రైమాసికంలో రూ.3,200.6 కోట్ల నికర లాభాన్ని ప్రకటించింది. గత ఏడాది ఇదే కాలంలో నమోదైన రూ.3,246.2 కోట్లతో పోలిస్తే లాభం 1.4 శాతం తగ్గింది. అయితే, కార్యకలాపాల ద్వారా వచ్చిన ఆదాయం రూ.22,697.3 కోట్ల నుంచి రూ.24,752.7 కోట్లకు పెరిగింది. గత త్రైమాసికంతో పోలిస్తే లాభం 4.5 శాతం తగ్గగా, ఆదాయం 1 శాతం వృద్ధి చెందింది. ఐటీ సేవల విభాగం ఆదాయం 261.15 కోట్ల డాలర్లుగా నమోదైంది. ఇది త్రైమాసిక ప్రాతిపదికన 0.1 శాతం తగ్గగా, వార్షిక ప్రాతిపదికన 0.3 శాతం పెరిగింది.

సమీక్షా త్రైమాసికంలో విప్రో ఇతర ఆదాయం రూ.947.7 కోట్ల నుంచి రూ.755.5 కోట్లకు తగ్గింది. అక్టోబరు నుంచి డిసెంబరు వరకు జరిగే తదుపరి త్రైమాసికంలో ఐటీ సేవల విభాగం నుంచి 257.1 కోట్ల నుంచి 262.5 కోట్ల డాలర్ల ఆదాయం వస్తుందని కంపెనీ అంచనా వేసింది. సెప్టెంబరు చివరి నాటికి విప్రో ఉద్యోగుల సంఖ్య 6,716 తగ్గి 2,36,328కు చేరింది. ప్రస్తుత ఆర్థిక సంవత్సరం తొలి ఆరు నెలల్లో కంపెనీ సుమారు వెయ్యి మంది నూతన ఉద్యోగులను నియమించుకుంది.