చమురు ధరల సెగతో స్టాక్ మార్కెట్‌పై ఒత్తిడి

ముడి చమురు ధరల పెరుగుదల, అంతర్జాతీయ అనిశ్చితులు, విదేశీ పోర్ట్‌ఫోలియో ఇన్వెస్టర్ల (ఎఫ్‌పీఐ) వరుస విక్రయాల నేపథ్యంలో దేశీయ స్టాక్ మార్కెట్‌పై ఒత్తిడి పెరుగుతోంది. మార్కెట్లో బలమైన రికవరీ కనిపించే వరకు ట్రేడర్లు, ఇన్వెస్టర్లు అప్రమత్తంగా ఉండాలని, ఎంపిక చేసిన షేర్లపైనే దృష్టి పెట్టాలని మార్కెట్ నిపుణులు సూచిస్తున్నారు. ఈ వారం వెలువడనున్న సెప్టెంబర్ త్రైమాసిక కార్పొరేట్ ఫలితాలు, అమెరికా ఫెడరల్ రిజర్వ్ ద్రవ్య విధాన నిర్ణయం, రిలయన్స్ జియో లిస్టింగ్, ముడి చమురు ధరలు, పశ్చిమాసియా పరిణామాలు మార్కెట్ దిశను ప్రభావితం చేయనున్నాయి. అక్టోబర్ 28న విడుదల కానున్న సెప్టెంబర్ పారిశ్రామికోత్పత్తి, తయారీ రంగ గణాంకాలు అంతర్జాతీయ ఒత్తిళ్ల మధ్య దేశీయ రంగాల పనితీరును అంచనా వేయడానికి ఉపయోగపడనున్నాయి. వారాంతంలో ద్రవ్యలోటు వివరాలు, బ్యాంకుల రుణాలు–డిపాజిట్ల వృద్ధి, విదేశీ మారక నిల్వల గణాంకాలు కూడా వెలువడనున్నాయి. టీవీఎస్ మోటార్, ఏషియన్ పెయింట్స్, ట్రెంట్, సన్‌ఫార్మా, భారత్ ఎలక్ట్రానిక్స్, ఇండియన్ ఆయిల్, బ్యాంక్ ఆఫ్ బరోడా, గెయిల్ ఇండియా సహా సుమారు 156 కంపెనీలు తమ త్రైమాసిక ఫలితాలను ప్రకటించనున్నాయి. కంపెనీల ఆదాయ వృద్ధి, లాభాల మార్జిన్లు, యాజమాన్యాల భవిష్యత్ అంచనాలను ఇన్వెస్టర్లు నిశితంగా పరిశీలించనున్నారు. ఇప్పటికే అంచనాలకు తగ్గ ఫలితాల కారణంగా కొన్ని ప్రముఖ బ్యాంకింగ్ షేర్లలో దిద్దుబాటు చోటుచేసుకోవడంతో, రానున్న ఫలితాలు మార్కెట్ గమనాన్ని ప్రభావితం చేయనున్నాయి.

అంతర్జాతీయ పరిణామాలు కూడా ఈ వారం మార్కెట్ సెంటిమెంట్‌ను ప్రభావితం చేయనున్నాయి. అమెరికా ఫెడరల్ రిజర్వ్ అక్టోబర్ 28న ద్రవ్య విధాన నిర్ణయాన్ని ప్రకటించనుంది. వడ్డీ రేట్లలో మార్పులు ఉండకపోవచ్చని అంచనాలు ఉన్నప్పటికీ, భవిష్యత్తులో రేట్ల దిశపై ఫెడ్ ప్రకటన, చైర్మన్ వ్యాఖ్యలను ఇన్వెస్టర్లు నిశితంగా గమనించనున్నారు. యూరోపియన్ సెంట్రల్ బ్యాంక్, బ్యాంక్ ఆఫ్ జపాన్ కూడా అక్టోబర్ 29, 30 తేదీల్లో తమ విధాన నిర్ణయాలను ప్రకటించనున్నాయి. మరోవైపు, పశ్చిమాసియాలో ఉద్రిక్తతలు, హార్ముజ్ జలసంధి ద్వారా ఇంధన సరఫరాకు ఆటంకాలు ఏర్పడవచ్చనే ఆందోళనలు ముడి చమురు ధరలను పెంచుతున్నాయి. బ్రెంట్ క్రూడ్ ధరలు అధిక స్థాయిలో కొనసాగుతుండటం భారత్ వంటి చమురు దిగుమతి దేశాలకు ఆందోళన కలిగిస్తోంది. నిఫ్టీకి 22,300 స్థాయి తక్షణ మద్దతుగా ఉండగా, ఈ స్థాయి కిందకు జారితే 22,000 వరకు మరింత పతనమయ్యే అవకాశం ఉందని మార్కెట్ విశ్లేషకులు భావిస్తున్నారు. పైవైపు 22,850–22,900 శ్రేణి కీలక నిరోధంగా కొనసాగుతోంది. ఈ స్థాయిని అధిగమించలేకపోతే, మార్కెట్ పెరిగినప్పుడు విక్రయించే వ్యూహంతో అప్రమత్తంగా ఉండాలని నిపుణులు సూచిస్తున్నారు. అయితే కొనుగోళ్లు బలపడి నిఫ్టీ ఈ నిరోధాన్ని దాటితే 23,000–23,150 స్థాయిల వైపు కదిలే అవకాశం ఉంది.

గతవారం నాలుగు ట్రేడింగ్ రోజులు మాత్రమే ఉన్నప్పటికీ, దేశీయ స్టాక్ మార్కెట్లు నష్టాలతో ముగిశాయి. సెన్సెక్స్ 1,605 పాయింట్లు, నిఫ్టీ 546 పాయింట్లు పడిపోయాయి. అంతర్జాతీయ అనిశ్చితులు, బ్రెంట్ క్రూడ్ ధరల పెరుగుదల ఇన్వెస్టర్ల సెంటిమెంట్‌ను దెబ్బతీశాయి. ఈ పతనం ప్రధాన సూచీలకే పరిమితం కాకుండా మిడ్‌క్యాప్, స్మాల్‌క్యాప్ షేర్లకూ విస్తరించగా, ఐటీ షేర్లు కొంత నిలకడను ప్రదర్శించాయి. అక్టోబర్ 28న జరగనున్న రిలయన్స్ జియో లిస్టింగ్‌పై మార్కెట్ వర్గాలు ప్రత్యేక దృష్టి సారించాయి. ఈ ఐపీఓకు 22.19 రెట్ల సబ్‌స్క్రిప్షన్ లభించడంతో ప్రాథమిక మార్కెట్‌లో భారీగా నిధులు సమీకరించబడ్డాయి. దీంతో సెకండరీ మార్కెట్‌లో లిక్విడిటీపై ఒత్తిడి పెరిగింది. లిస్టింగ్ పూర్తయిన తర్వాత ఐపీఓలో నిలిచిన నిధులు తిరిగి మార్కెట్‌లోకి రావడం, జియో షేర్లకు లభించే స్పందన సూచీలకు ఊరటనిస్తాయా అన్నది ఆసక్తికరంగా మారింది. ద్రవ్యోల్బణ ఒత్తిళ్లు, బలహీన కార్పొరేట్ ఫలితాలు, భౌగోళిక రాజకీయ అనిశ్చితుల నేపథ్యంలో అక్టోబర్ 23 నాటికి విదేశీ ఇన్వెస్టర్లు దేశీయ మార్కెట్ నుంచి రూ.48,056 కోట్ల విలువైన ఈక్విటీలను విక్రయించారు. 2026లో ఇప్పటివరకు వారి నికర ఉపసంహరణలు రూ.3.08 లక్షల కోట్లకు చేరినట్లు సమాచారం. ఇది 2025 పూర్తి సంవత్సరంలో ఉపసంహరించిన రూ.1.66 లక్షల కోట్లతో పోలిస్తే దాదాపు రెట్టింపు. అయితే గతవారం ఎఫ్‌పీఐల విక్రయాల తీవ్రత కొంత తగ్గడంతో మార్కెట్‌కు స్వల్ప ఊరట లభించింది. ఈ వారం ఆ ధోరణి కొనసాగుతుందా, లేక మళ్లీ అమ్మకాల ఒత్తిడి పెరుగుతుందా అన్నది ఇన్వెస్టర్లు గమనించనున్నారు.