సిగ్మా అడ్వాన్స్‌డ్‌ సిస్టమ్స్‌కు భారీ ఆర్డర్‌

ఏరోస్పేస్‌, రక్షణ రంగంలో కార్యకలాపాలు నిర్వహిస్తున్న సిగ్మా అడ్వాన్స్‌డ్‌ సిస్టమ్స్‌కు రోల్స్‌ రాయిస్‌ నుంచి రూ.1,600 కోట్ల విలువైన భారీ దీర్ఘకాలిక ఆర్డర్‌ లభించింది. ఈ కాంట్రాక్ట్‌ కింద రోల్స్‌ రాయిస్‌ తయారు చేసే విమాన ఇంజిన్లలో ఉపయోగించే కీలక విడిభాగాలను సిగ్మా సరఫరా చేయనుంది.

ఇటీవల టేకోవర్‌ చేసిన బ్రిటన్‌కు చెందిన అనుబంధ సంస్థ బ్రామ్‌ఫోర్డ్‌ ప్రెసిషన్‌ సొల్యూషన్స్‌ ద్వారా ఈ దీర్ఘకాలిక కాంట్రాక్ట్‌ లభించినట్లు కంపెనీ వెల్లడించింది. బ్రిటన్‌లోని అనుబంధ సంస్థతో పాటు భారత్‌లోని సిగ్మా అడ్వాన్స్‌డ్‌ సిస్టమ్స్‌ యూనిట్లలోనూ విడిభాగాలను తయారు చేసి సరఫరా చేయనున్నట్లు తెలిపింది.