ఈవీ కొనేముందు పూర్తి వివరాలు తెలుసుకోవాలి: రవాణా శాఖ అధికారి

పెట్రోల్, డీజిల్ ఖర్చులను తగ్గించుకోవడంతోపాటు పర్యావరణ పరిరక్షణకు దోహదపడే ఎలక్ట్రిక్ వాహనాలపై ప్రజల్లో ఆసక్తి పెరుగుతోంది. బాపట్ల జిల్లా కలెక్టర్ వినోద్ కుమార్ ప్రతి సోమవారం తన క్యాంపు కార్యాలయం నుంచి ఈవీ స్కూటర్‌పై కలెక్టరేట్‌కు వస్తూ విద్యుత్తు వాహనాల వినియోగాన్ని ప్రోత్సహిస్తున్నారు. అధికారులు, ఉద్యోగులు, ప్రజలు కూడా ఈవీలను కొనుగోలు చేయాలని సూచిస్తున్నారు. జిల్లాలో ఇప్పటికే 2,500కు పైగా ఎలక్ట్రిక్ వాహనాలు తిరుగుతున్నట్లు సమాచారం. స్కూటర్లు, బైక్‌లు, ఆటోలు, కార్లతోపాటు ప్రజా రవాణాలోనూ విద్యుత్తు బస్సుల వినియోగం పెరుగుతోంది. బాపట్ల, చీరాల, రేపల్లెలో కొత్త షోరూమ్‌లు ఏర్పాటవుతుండగా, పట్టణాలు, జాతీయ రహదారుల వెంబడి ఛార్జింగ్ స్టేషన్లను ఏర్పాటు చేస్తున్నారు. అయితే, తక్కువ ధరలు, ఆకర్షణీయమైన ఆఫర్లకు ఆకర్షితులై తొందరపడి వాహనాలను కొనుగోలు చేయవద్దని నిపుణులు సూచిస్తున్నారు. కంపెనీ విశ్వసనీయత, వినియోగదారుల సమీక్షలు, ఫిర్యాదులు, సర్వీసు సౌకర్యాలు, విడిభాగాల లభ్యత, వారంటీ, బీమా, రిజిస్ట్రేషన్ పత్రాలను పరిశీలించాలని చెబుతున్నారు.

ఈవీ కొనుగోలు సమయంలో బ్యాటరీ నాణ్యత, ఛార్జింగ్ భద్రత, వాస్తవ ప్రయాణ పరిధిపై ప్రత్యేక శ్రద్ధ వహించాలని నిపుణులు సూచిస్తున్నారు. బ్యాటరీకి బీఐఎస్ ధ్రువీకరణ ఉందో లేదో, కనీసం మూడు నుంచి ఐదేళ్ల వారంటీ లభిస్తుందో లేదో తెలుసుకోవాలి. బ్యాటరీ సామర్థ్యం, మార్చాల్సి వస్తే అయ్యే ఖర్చు, నీరు, దుమ్ము నుంచి రక్షణకు సంబంధించిన ఐపీ రేటింగ్‌ను పరిశీలించాలి. కంపెనీ ప్రకటించే రేంజ్‌కు, వాస్తవ ప్రయాణ పరిధికి తేడా ఉండవచ్చని గుర్తించాలి. రోజుకు 50 కిలోమీటర్లలోపు ప్రయాణించే వారికి అనేక ఈవీ మోడళ్లు అనుకూలంగా ఉండవచ్చు. సుదూర ప్రయాణాలు చేసేవారు మార్గమధ్యంలో ఛార్జింగ్ స్టేషన్ల లభ్యతను ముందుగానే తెలుసుకోవాలి. ఇంట్లో ఛార్జింగ్ కోసం సరైన వైరింగ్ ఏర్పాటు చేసుకుని, కంపెనీ సూచించిన ఛార్జర్‌నే వినియోగించాలి. అధిక ఛార్జింగ్, నాసిరకం ఛార్జర్ల వాడకాన్ని నివారించాలి. తరచూ జాతీయ రహదారులపై ప్రయాణించేవారు తమ అవసరాలకు సరిపోయే ఎక్కువ రేంజ్ ఉన్న మోడళ్లను ఎంచుకోవాలని నిపుణులు సూచిస్తున్నారు. ఈవీ కొనుగోలు చేసే ముందు అన్ని వివరాలను ఒకటికి రెండుసార్లు పరిశీలించాలని జిల్లా రవాణా అధికారి పరంధామరెడ్డి తెలిపారు. విద్యుత్తు వాహనాల వినియోగాన్ని ప్రోత్సహించేందుకు ప్రభుత్వం రోడ్డు పన్ను నుంచి పూర్తిగా మినహాయింపు ఇచ్చినట్లు ఆయన పేర్కొన్నారు.